O alcalde de Ferrol, José Manuel Rey Varela, asistiu esta tarde á presentación da última creación audiovisual que leva o selo da ferrolá Chelo Loureiro, nun acto enmarcado no calendario de celebracións do 25N, Día Internacional contra a Violencia de Xénero.

Baixo o título Eu vou comigo, o teatro Jofre foi o escenario da estrea da referida película, de contido educacional, coa que o Concello de Ferrol pretende fomentar a igualdade, a autoestima e a prevención das violencias na infancia.

Pola súa banda, o rexedor amosou, unha vez máis, a admiración polo traballo da laureada creadora local, que atesoura catro Premios Goya, e a que se referiu como “una das personalidades máis destracadas que a nosa cidade tivo a honra de ver nacer”. Rey Varela subliñou o “total compromiso do Concello de Ferrol na loita contra a lacra da violencia de xénero” e lembrou que no que vai de ano 41 mulleres foron asasinadas, “unha cifra que temos que frear entre todos”, instou o alcalde.

Tras a proxección, a compañía Mundo-Danza, de Jesús Quiroga, puxo o broche no teatro ferrolán.