O alcalde de Ferrol, José Manuel Rey Varela, visitou esta mañá o resultado das obras de rehabilitación integral do local sociocultural da asociación de veciños de Serantes, localizado na avenida 19 de febrero, 25. A actuación será recepcionada polo Concello este xoves, 28 de novembro.

Os traballos supuxeron unha inversión de 748.081,19 euros -dos que 215.777,15 euros están financiados pola Unión Europea-Next Generation EU- a través do Plan de Recuperación, Transformación e Resiliencia para uns traballos adxudicados á empresa Prace Servicios y Obras.

O alcalde celebrou a culminación destas obras (cunha superficie total construída de 346 metros cadrados), coas que se pon a disposición dos veciños e veciñas “un local social do século XXI”.

O edificio orixinal foi completamente renovado e entre as principais intervencións destacan a reestruturación integral do interior. Renováronse completamento os espazos interiores respectando a estrutura orixinal, grazas ao cal o edificio conta agora cun amplo salón de actos, oficinas, biblioteca e salas polivalentes.

Así mesmo, realizáronse melloras na accesibilidade que consistiron na incorporación de rampas e aseos adaptados, garantindo que o edificio sexa inclusivo; e modernizáronse as infraestruturas eléctricas, de fontanería e climatización, incorporando sistemas eficientes e sostibles, como bombas de calor e un sistema de iluminación LED.

Agora, ademais, os espazos contan con revestimentos adecuados aos tempos actuais e duradeiros que melloran a estética e a funcionalidade do edificio. Tamén se actuou no illamento térmico e acústico, reforzando a envolvente do edificio con materiais que reducen o consumo enerxético e que melloran as condicións acústicas.

CONSTRUCIÓN DUN ESPAZO PARA CAFETERÍA

O proxecto executado incluíu a construción dun novo volume independente destinado a albergar unha cafetería. “Este espazo foi deseñado como un punto de encontro”, afirmou o alcalde, e localízase de xeito estratéxico no recinto, complementando os servizos do edificio principal.