O alcalde de Ferrol, José Manuel Rey Varela, acompañado da concelleira de Muller e Igualdade, Elvira Miramontes, presentou esta tarde o libro Ferrol en feminino, unha edición recompilatoria deste programa co que dar a coñecer o legado das mulleres na nosa cidade. “Con Ferrol en feminino embarcámonos nunha viaxe a través do tempo coa que descubrimos, a propios e foráneos, a vida de mulleres correntes ou famosas que sumaron o seu grao de area á historia e á vida dunha cidade sempre vibrante desde o punto de vista social e cultural”, apuntou o rexedor.

A través deste libro, editado polo Concello de Ferrol e co Pacto de Estado contra a violencia de xénero, o lector percorre a cidade descubrindo mullleres que aquí viviron e que axudaron a levantar Ferrol cos seus traballos no porto, as lavandeiras, as augadoras, carboeiras, as amas de cría, mestras, músicas, científicas, poetisas, amas de casa...“Todas estas mulleres souberon sortear no seu tempo as grandes dificultades que tiveron para poder exercer os seus traballos”, afirmou o alcalde. E empregando a frase da ilustre ferrolá, Concepción Arenal, canto máis se dividen os obstáculos máis doados son de vencer, Rey Varela asegurou que “seguiremos traballando dende o concello sumando o apoio das entidades, unindo esforzos por unha cidade en igualdade de condicións para todos e todas”.