Canal RSS de novas

Comparte esta páxina

Facebook

Twitter

Google +

sábado, 18 de marzo de 2023

O Concello e a Universidade retoman contactos para crear unha residencia de estudantes no Sánchez Aguilera tras a ratificación do convenio con Defensa

Alcalde, vicerreitoras do Campus e de Infraestruturas e edil de Urbanismo visitaron varios edificios para comprobar as posibilidades que teñen de acordo coas necesidades da UDC. Ángel Mato reiterou o seu desexo de que no futuro ese espazo do antigo acuartelamento “forme parte dese campus universitario que unha cidade coma Ferrol merece ter”. María Jesús Movilla asegurou que a cesión dos inmobles por parte da Administración local serviría para dar “un salto de nivel nas instalacións que se ofrecerían ao estudantado”

Tras a ratificación do convenio entre o Concello e o Instituto de Vivenda, Infraestrutura e Equipamento da Defensa (Invied), o goberno local e a UDC retomaron esta semana o traballo para dotar á cidade dunha residencia universitaria, un proxecto que deu os seus primeiros pasos hai xa dúas décadas. O alcalde, Ángel Mato, e o concelleiro de Urbanismo, Julián Reina, reuníronse coa vicerreitora do Campus de Ferrol e Responsabilidade Social, María Jesús Movilla, e coa de Infraestruturas e Sustentabilidade, Amparo Casares, co fin de analizar a cesión de inmobles do acuartelamento (que vai pasar a ser de titularidade municipal) á Universidade. 

Na zona da parcela máis próxima á esquina das rúas Cardosas e Virxe da Cabeza atópanse varios edificios que serviron no pasado como aloxamento militar. Tras a xuntanza no pazo municipal, visitaron tres deles para estudar as posibilidades que ofrecen, dentro das necesidades que ten a Universidade. O obxectivo é cubrilas a través dun proxecto de rehabilitación e así dar servizo ao estudantado do campus ferrolán. 

Dedicar parte do Sánchez Aguilera para eses usos universitarios é unha iniciativa para a que a UDC incluso impulsara no 2009 un concurso de ideas en cuxo xurado participaran tamén técnicos municipais. Tras máis dunha década no que o convenio con Defensa pasou por distintas vicisitudes, o seu peche definitivo abre a posibilidade de volver impulsar esa idea. 

Durante a visita ao acuartelamento, o alcalde reiterou o seu desexo de que ese espazo “forme parte dese campus universitario que unha cidade como Ferrol merece ter”. Mato dixo tamén que o Concello vai ser “coidadoso” no desenvolvemento da área co fin de “manter o seu valor patrimonial”. 

Pola súa banda, a vicerreitora do Campus de Ferrol destacou a importancia de “aproveitar as posibilidades de colaboración co Concello” e mostrou a súa satisfacción por que o proxecto vaia proporcionar “mais espazo para a Universidade”. “Sería un salto de nivel nas instalacións que poderiamos ofrecer ao estudantado”, concluíu Movilla.