Web Municipal do Concello de Ferrol

Inicio Concello De actualidade Novas

Comparte esta páxina

venres, 17 de marzo de 2023

O Concello programa na Casa da Muller obradoiros gratuítos ata o mes de xuño

Xa está aberto o prazo de inscrición a través da web https://bit.ly/3JLL8Cp para participar desde finais de marzo en actividades como ioga e mindulfness, costura e patronaxe, autocoñecemento a través da danza e reciclaxe. O novo plan ‘A Casa Aberta’ ofrece en total 90 prazas

O Concello de Ferrol pon en marcha un ciclo de obradoiros gratuítos na Casa da Muller (rúa Lugo, 56) destinados a mulleres empadroadas en Ferrol. O novo programa ‘A Casa Aberta’ ofrecerá a partir de finais de marzo sesións nas que aprender sobre reciclaxe, autociencia corporal e empoderamento feminino en diferentes datas e horarios ata o próximo mes de xuño. O prazo para anotarse está aberto desde hoxe, venres 17 de marzo, ata o día 23 de marzo, ás 23:59 horas, no enlace https://bit.ly/3JLL8Cp, onde se atopa toda a información das actividades que ofrece o programa.

A concelleira de Muller e Igualdade, Cristina Prados, explicou que haberá cinco grupos de talleres cunha oferta variada de actividades que terán entre unha e dúas horas de duración por sesión. O novo programa tamén inclúe sesións enfocadas á danza, ao fortalecemento do solo pélvico ou á conexión da mente e o corpo a través de ioga e mindfulness e, por outro lado, opcións que fomentan o traballo manual e a economía circular a través da costura e a reciclaxe.

Para poder participar é necesario ser maior de 18 anos e estar empadroada en Ferrol, e só será posible seleccionar unha actividade por cada participante. A inscrición farase de forma telemática ou presentando o formulario de inscrición no Rexistro Xeral do Concello. A adxudicación realizarase segundo a orde de apuntamento e as mulleres admitidas serán notificadas telefonicamente o día 24 de marzo.