O Concello de Ferrol prosigue cos traballos de
humanización e renovación integral do parque de Fontelonga, no barrio de Caranza,
unha intervención á que a Administración local destina preto de 530.000 euros. Na
actualidade estanse a construír os novos bancos, de pedra e madeira, que se están a
habilitar en distintos puntos do novo espazo verde. En total acondicionaranse 115
metros lineais repartidos en varios tramos de asentos, dos que dous xa son visibles.
O concelleiro de Urbanismo, Julián Reina, visitou onte os traballos acompañado
por técnicos municipais e responsables da obra e anunciou que xa está instalado o
sistema de recollida de augas e delimitados con bordos todos os camiños peonís: un
perimetral e tres que atravesan o parque. Ademais explicou que ao mesmo tempo estase
a acondicionar o terreo para acoller o que será un gran parque infantil con multitude de
xogos e zonas verdes.
A renovación e humanización do parque de Fontelonga inclúe tres zonas de
xogos, a instalación dunha tirolina e a construción dunha pista multideporte. Tamén se
colocará novo mobiliario urbano e plantaranse máis árbores. A primeira zona de xogos, para pequenos, contará cun areeiro de preto de 50 metros cadrados, un ‘escritorio de
area’ con tres asentos, un balancín triplo e unha zona de bancos para os coidadores dos
pequenos.
Tirolina de 33 metros
A segunda, para nenos de máis idade, situarase no espazo que ata agora ocupaba o
parque infantil, que pasará de 110 metros cadrados a 300. Contará cun gran xogo de
bolboreta dobre formado por un entramado de cordas dentro dunha estrutura ondulada
de aceiro con membranas deslizantes a modo de hamaca ou asento, paneis sensoriais
xiratorios de diferentes texturas e cores e asentos en forma de concha colgante e tubos.
Este parque dispoñerá tamén dun elemento xiratorio tipo carrusel, un bambán dobre con
asentos planos, outro triple —cun asento niño, outro para bebé e outro bebé-adulto que
permite a este último balancearse á vez que o rapaz, un fronte ao outro—, e varios
bancos. Entre ambos parques infantís, ademais, colocarase unha tirolina de 33 metros de
lonxitude.
Por último, para a terceira zona de xogo, orientada a xente moza, aproveitarase a
pista deportiva actual para dedicar espazos a tres actividades físicas diferentes. No
primeiro dispoñerase dunha pista con dúas canastras e porterías de fútbol e na segunda
colocarase unha canastra de baloncesto ‘sorpresa’ —unha cunca elevada en forma de
cesta con tres aperturas na parte inferior, polo que o xogador debe esperar a saída do
balón por algún dos tres canais— e unha serie de marcas que permitirán outro tipo de
xogos. No terceiro espazo habilitarase unha zona de calistenia ou workout que contará
cun banco de abdominais inclinado, espaldeira, agarradeiras laterais e tres barras
horizontais. O proxecto para Fontelonga contempla tamén a renovación das papeleiras e
unha nova iluminación que responderá aos estándares actuais de eficiencia enerxética.
Ás árbores existentes sumaranse 12 novos exemplares de jacarandá xunto aos camiños
interiores e unha liña de hortensias azuis en todo o lado sur do perímetro.
