A actuación contempla a realización de dúas rozas anuais nos camiños e nas estradas de titularidade municipal, entre maio e setembro. No 20 % realizaranse traballos para limpar vexetación de densidade media. En total, son arredor de 140 quilómetros. En canto ás áreas de densidade baixa (80 %), as medicións acadan un total de 560 quilómetros. Ademais, limparanse ata 70 quilómetros de gabias, segaranse 6.000 metros cadrados de parcelas municipais e rozarase unha área similar de praderías. Tamén se incluirán labores de eliminación de especies invasoras, limparanse cordóns de terra e entullos nas marxes das vías. 

En canto aos medios mecánicos, prevese o emprego de tractores con rozadoras de brazo articulado. Ás cuadrillas de operarios que se encargarán das operacións manuais, sumarase unha brigada de apoio para mantemento ou necesidades puntuais que poidan xurdir. 

A edil de Zona Rural agradeceulles ao representantes veciñais o apoio unánime que mostraron aos termos deste proxecto, que reiteraron ante a corporación onte a través do seu presidente, e destacou que nunca antes o Concello contou cun servizo de rozas tan ambicioso coma o que se vai poder poñer en marcha a través do convenio coa Deputación, tal como o demostra o resultado dos traballos realizados por Tragsa o verán pasado.