Web Municipal do Concello de Ferrol

Inicio Concello De actualidade Novas

Comparte esta páxina

martes, 14 de marzo de 2023

A edil de Benestar Social reclama á Xunta que “asuma as súas competencias” na xestión do Servizo de Atención no Fogar

Eva Martínez Montero pediu esta mañá ao goberno de Galicia que busque unha fórmula que permita aumentar de xeito puntual e temporal o prezo/hora por mor do aumento da inflación e asuma a diferencia posto que se trata dunha competencia autonómica. Estivo acompañada polo representante de CC.OO do sector das traballadoras do servizo de axuda no fogar, Luis Rodas

A concelleira de Benestar Social, Eva Martínez Montero, compareceu esta mañá para mostrar a súa “preocupación” pola situación que está a vivir o sector da atención no fogar a persoas dependentes. Lembrou que desde xullo de 2021 está en vigor en Ferrol un contrato para dar servizo ás persoas con dependencia, o Servizo de Axuda no Fogar (SAF), cun orzamento de arredor de máis 5 millóns de euros anuais, o que supón preto do 90 % da partida anual da área municipal que dirixe. Este contrato ten unha duración de dous anos, prorrogables anualmente ata un máximo de outros dous (2+1+1), polo que en xullo deste ano comezaría a primeira prórroga, de obrigado cumprimento, apuntou, “posto que estamos a falar dun servizo esencial”. A edil estivo acompañada polo representante de CCOO do sector das traballadoras do servizo de axuda no fogar, Luis Rodas.

O aumento da inflación rexistrado nos dous primeiros anos de contrato “tamén está a afectar á prestación de servizos”. No caso do SAF, ademais, explicou que o colectivo de traballadores “non ten convenio en Galicia, polo que os seus incrementos salariais serían, a priori, os marcados polo IPC, moi elevado na actualidade”. Esto, dixo, pon en “perigo a viabilidade dun servizo esencial posto que está dirixido a un sector especialmente vulnerable e prestado maioritariamente por mulleres”. Neste senso, denunciou que o aumento acorde co IPC que solicita o sector “recaería nos concellos cando as competencias corresponden ao goberno autonómico”.

Ante esta situación, a Xunta “está a mirar cara a outro lado”. Explicou que na actualidade o prezo total é de 17,25 euros/hora, do que este ano a Xunta aporta un máximo de 11,5 euros/hora, o usuario arredor de 2 euros/hora e o resto os concellos. A inflación xerou “un problema económico para todas as partes”, explicou, polo que reclamou á Xunta que “busque unha fórmula que permita aumentar de xeito puntual e temporal arredor dun 4 % o prezo total da hora e que asuma esa diferencia para permitir a continuidade e viabilidade do servizo” posto que, insistiu, “a competencia é autonómica”.

Martínez Montero engadiu que “co obxectivo de garantir a viabilidade do servizo”, o goberno local acaba de contratar o estudo económico e redacción de pregos para iniciar o proceso de licitación dun novo contrato antes de que remate a primeira prórroga dun ano. É unha situación “anómala”, dixo, “pero necesaria posto que “queremos garantir o servizo e que todas as partes implicadas estean nunha situación digna”. Polo tanto, “esiximos que a Xunta de Galicia deixe de actuar como mero espectador ante esta realidade e asuma a súa responsabilidade e as súas competencias”.