O alcalde de Ferrol, Ángel Mato, vai presidir mañá martes na
Casa de Galicia de Madrid un acto ás 19.30 horas no que se promocionarán a través da
proxección de cinco vídeos varios eventos turísticos que se celebran cada ano na cidade.
Entre eles visualizarase un dedicado á Festa das Pepitas, que terá lugar a próxima fin de
semana e da que o Concello está a avanzar na tramitación do expediente para que sexa
declarada Festa de Interese Turístico Nacional, unha distinción que outorga o Ministerio
de Industria, Comercio e Turismo. Neste senso, o Concello está na actualidade a reunir
información para a elaboración da memoria que soporte esta iniciativa.
Ademais, está a
proxectarse o deseño dunha páxina web que aglutine toda a información relativa a esta
proposta.
Ademais do vídeo promocional sobre a Festa das Pepitas, que contará coa
intervención de Pedro Blanco en representación das rondallas de Ferrol, tamén se
proxectará outro sobre Ferrol como destino turístico, que presentará a concelleira
responsable de Turismo, Eva Martínez Montero. O terceiro estará dedicado ao Festival
Meninas de Canido, do que falará Eduardo Hermida, o promotor da cita que cada mes de
setembro se celebra na cidade.
A edil tamén introducirá o cuarto vídeo, dedicado á Semana Santa ferrolá, e o Tik
Tok sobre o Festival Ilustrado —cuxa segunda edición terá lugar entre os días 14 e 16 de
abril— que resultou gañador no concurso creativo entre escolares promovido hai uns
meses polo Concello de Ferrol para divulgar a candidatura de Ferrol a Patrimonio
Mundial. Para rematar, a guía turística en Ferrol Isabel Díaz-Robles intervirá para abordar
o patrimonio histórico co que conta a cidade e introducirá outro vídeo sobre a Ilustración.
Visita dunha ducia de medios para dar a coñecer a cidade
Ademais do evento de mañá en Madrid, o sábado día 18 de marzo, día das Pepitas, e o
domingo 19 celebrarase na cidade un ‘press-trip’ no que participarán unha ducia de
medios de comunicación de todo o territorio nacional. Serán dúas xornadas nas que
percorrerán espazos de referencia da cidade desde o punto de vista turístico e no marco
da candidatura de Ferrol a Patrimonio Mundial, como o Museo da Construción Naval, o
barrio da Magdalena, acudirán a o Teatro Jofre, visitarán edificios modernistas, gozarán
da actuación das rondallas na praza de Armas, percorrerán a ruta das Meninas de Canido,
o porto de Curuxeiras (orixe do Camiño Inglés) e visitarán o castelo de San Felipe, ao que
chegarán en barco tras un paseo en barco.
