Web Municipal do Concello de Ferrol

Inicio Concello De actualidade Novas

Comparte esta páxina

xoves, 09 de marzo de 2023

O Concello avanza na mellora do mobiliario urbano dos barrios con novas mesas picnic en zonas verdes

A concelleira de Obras e Servizos, Ana Lamas, visitou esta mañá a colocación dun novo elemento no parque Pedro Padrón, ao final da rúa Curros Enríquez, no barrio de San Xoán

O Concello de Ferrol continúa coa renovación e ampliación do mobiliario urbano en diferentes barrios. Na actualidade estase a executar a posta a punto de bancos e outros elementos en Esteiro e de xeito paralelo a Administración local está a colocar novas mesas picnic en varios puntos da cidade. Xa se instalaron na zona verde próxima ao parque infantil de Covas; no de San Pablo-Catabois; na praza García Sabell, en Caranza; e en dous puntos de Esteiro: nas inmediacións da biblioteca universitaria Casa do Patín e no parque infantil da rúa Naturalista López Seoane.

Pola súa banda, esta mañá a concelleira de Obras e Servizos, Ana Lamas, visitou os traballos de colocación dun nova mesa picnic na zona verde do parque Pedro Padrón, ao final da rúa Curros Enríquez, no barrio de San Xoán. A edil anunciou que nos próximos días se instalarán tamén nos parques Pablo Iglesias, en Esteiro, e no de Pío V, no barrio de Caranza. Nestes dous barrios tamén se colocarán nos vindeiros días mesas picnic accesibles.

Máis xogos e acondicionamento do terreo

Na súa visita esta mañá ao parque Pedro Padrón, en San Xoán, Lamas anunciou que o Concello vai eliminar o noiro co aporte de terra para nivelar e acondicionar o terreo próximo ao parque. Ademais, está previsto incorporar novos xogos infantís.