Tras a comisión, Reina lembrou que na actualidade as obras están en proceso de adxudicación. A intervención ten un orzamento total de preto de medio millón de euros, dos que o Estado asume unha cantidade superior aos 270.000 euros. O edil destacou que se trata dunha obra “moi relevante” por dous motivos. En primeiro lugar porque “é a primeira vez que o Concello de Ferrol acadou a subvención do 1,5 % Cultural” e en segundo lugar porque vai posibilitar unha mellor conservación da zona central do castelo e da situada máis próxima ao acceso principal. Esta actuación é unha mostra máis, apuntou, “do esforzo que está a facer este goberno por rehabilitar e poñer en valor un dos nosos mellores bens”. 

A actuación sobre as cubertas pétreas e o sistema de evacuación de augas pluviais inclúe unha limpeza en profundidade destas áreas, a reparación de fisuras e a adhesión de pezas desprendidas, a substitución de sumidoiros, a colocación de gárgolas de zinc no interior das pétreas, reparación de lousas de granito, retirada de tapiados de ladrillo, retirada de diversas reixas e a eliminación de recebos nas zonas interiores, entre outras actuacións. En definitiva, trátase dunha intervención “vital” para a conservación do castelo “que se realizará con sumo coidado”, apuntou Reina.