xoves, 02 de marzo de 2023
O Concello axardina con 600 novas plantas perennes a rotonda do monumento á música, en Caranza
A concelleira de Obras e Servizos, Ana Lamas, visitou os traballos e anunciou que se están a colocar hortensias, lavandas, salvias, rudbeckias, achilleas e verónicas, entre outras, que coinciden na súa floración desde primavera ata outono
O Concello de Ferrol continúa cos labores de mantemento e mellora das zonas verdes da cidade. A finais da semana pasada comezou o axardinamento da rotonda do monumento á música, fronte ao Conservatorio Xan Viaño, no barrio de Caranza. A concelleira de Obras, Servizos e Medio Ambiente, Ana Lamas, acudiu esta mañá acompañada por técnicos municipais e representantes veciñais á zona para ver o avance das plantacións.
A edil explicou que en total haberá arredor de 600 novas plantas perennes, como
hortensias, lavandas, salvias, rudbeckias, achilleas e verónicas, entre outras. Todas elas,
indicou, coinciden na súa floración desde a primavera ata o outono. “Estamos a
acondicionar unha infraestrutura verde moi natural, unha illa de biodiversidade que sen
dúbida mellorará a imaxe deste espazo, antes degradado”, puntualizou. Ademais se
preparou o terreo cun aporte de 40 metros cúbicos de terra para recrecer o nivel do
espazo natural da glorieta e colocáronse varias pedras de gran tamaño como elementos
ornamentais. Trátase dunha intervención con plantas “máis adaptadas á seca e á
insolación”.
Lamas engadiu que esta actuación de axardinamento complementa a que se está a
levar a cabo na rúa Telleiras, onde se están executando labores de poda.
