Web Municipal do Concello de Ferrol

Inicio Concello De actualidade Novas

Comparte esta páxina

mércores, 01 de marzo de 2023

Ángel Mato valora que os plans de ordenación do espazo marítimo sitúen Ferrol como centro da eólica mariña a nivel estatal

“Dispoñemos de todo o conglomerado industrial tanto para a construción dos parques como para a súa operación e o seu mantemento”, asegurou o alcalde sobre a creación ante as costas da comarca da meirande zona de alto potencial para o desenvolvemento desa tecnoloxía de xeración enerxética

O alcalde, Ángel Mato, valorou hoxe o contido dos plans de ordenación do espazo marítimo (POEM) que vén de aprobar o Consello de Ministros. “Damos un paso de xigante como país e estou moi satisfeito de que o Goberno estea na liña do que vimos reivindicando dende Ferrol para que sexa posible crear novos parques de eólica mariña”, valorou o rexedor. Isto vai permitir, dixo, que España non só lidere a construción dos soportes para as plantas de produción de enerxía eólica mariña, senón que tamén terá nas súas propias costas, onde o recurso eólico é mais abondoso, infraestruturas que permitirán o abaratamento da enerxía e “reducir a dependencia de outros países para non estar sometidos a fluctuacións que teñen que ver, por exemplo, co contexto xeopolítico”.

Para Mato, “é unha gran noticia para a cidade porque en Ferrol e Ferrolterra dispoñemos de todo o conglomerado industrial tanto para a construción dos parques como para a súa operación e o seu mantemento”, de modo que vai supoñer xeración de emprego e novas oportunidades de diversificación industrial. Ademais, vai permitir “avanzar en innovación e reter o talento e que a xente nova se poida incorporar a un sector á alza en todo o mundo, e especialmente en Europa”, dixo.

O alcalde considera que agora é necesario que as Administracións colaboren para que Ferrol poida acoller o polo de I+D en enerxías renovables mariñas e almacenamento, pero “tócalle á Xunta anunciar que ese centro se vai situar aquí, na cidade”, lembrou.

Finalmente, destacou a importancia de que se vai incorporar unha nova fonte limpa ao mix enerxético, e iso vai provocar o abaratamento da enerxía, pero quixo sinalar que se tivo moi en conta que os parques poidan convivir “con outro sector moi importante para Galicia, como é o da pesca”.