mércores, 01 de marzo de 2023
O Concello rematará esta semana con máis de 60 vehículos retirados da parcela do Sánchez Aguilera
En total está previsto retirar nesta primeira fase un total de 413 coches coa axuda de dous guindastres. O alcalde, Ángel Mato, trasladou esta semana á secretaria de Estado de Defensa que nos vindeiros días se convocará un pleno extraordinario para someter á votación dos grupos o convenio co Ministerio de Defensa, que regula que este e outros nove espazos pasarán a titularidade municipal
O Concello de Ferrol comezou a mediados do mes de febreiro a retirada de vehículos da céntrica parcela do antigo cuartel Sánchez Aguilera, delimitada pola avenida do Rei, a estrada de Catabois e as rúas Virxe da Cabeza, Cardosas e Roi Xordo. A empresa de despezamento adxudicataria para executar esta intervención está a trasladar coches ás súas instalacións para a súa posterior descontaminación e compactaxe. En total, retiraranse nesta primeira fase, coa axuda dun guindastre con capacidade para tres vehículos e outro para un, un total de 413 vehículos, os xa cualificados como residuos. A empresa xa sacou máis de 40 e a previsión é rematar esta semana con ao menos 60 vehículos fora da parcela.
