Novas

sábado, 21 de xaneiro de 2023

O Concello enriquece o programa de envellecemento activo para maiores que desenvolve no centro social de Río Xubia con charlas este mes sobre ciberseguridade e seguridade viaria

A primeira será o próximo luns, 23 de xaneiro, a cargo do delegado en Ferrol da unidade de Participación Cidadá da Policía Nacional e a segunda o luns día 30 da man dun axente da Policía Local, ambas ás 17.30 horas. Forman parte das iniciativas que a Administración local leva a cabo no local, onde cada luns se celebran actividades de estimulación mental, xogos e andainas. Están dirixidas a maiores de 65 anos veciños de Ferrol


O Concello de Ferrol continúa deseñando actividades dirixidas á poboación de maior idade co fin de promover a súa actividade e mellorar a súa calidade de vida. Dentro do programa de envellecemento activo que a Administración local desenvolve no centro social da rúa Río Xubia, o próximo luns, 23 de xaneiro, terá lugar unha charla sobre ciberseguridade impartida polo delegado da unidade de Participación Cidadá da Policía Nacional da Comisaría de Ferrol-Narón. Pola súa banda, o luns 30 de xaneiro un axente da Policía Local de Ferrol ofrecerá outra charla, neste caso sobre diferentes aspectos da seguridade viaria. 


Ambas celebraranse no local social ás 17.30 horas e poderán asistir ata 60 veciños de Ferrol maiores de 65 anos. Como explicou a concelleira de Benestar Social, Eva Martínez Montero, este tipo de iniciativas “pretenden formar e informar á cidadanía máis vulnerables, como neste caso son as persoas maiores, en cuestións de actualidade como son as estafas a través de internet ou dunha chamada de teléfono. 

As persoas maiores interesadas en participar no programa municipal de envellecemento activo, que se desenvolve cada luns no centro e inclúe xogos, estimulación mental e andainas, poden inscribirse no mesmo local os luns, de 10.30 a 13.30 horas e de 17 a 20 horas, ou entre diario facilitando os seus datos ao conserxe.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar