Web Municipal do Concello de Ferrol

Inicio Concello De actualidade Novas

Comparte esta páxina

sábado, 21 de xaneiro de 2023

O Concello iniciará a próxima semana a construción da base de formigón da nova beirarrúa da marxe das vivendas da rúa Igrexa, que chegará ata os catro metros

Está previsto que a colocación das novas lousas de granito comece a principios de febreiro polo quinteiro entre San Diego e Arce. As pedras históricas que se están a retirar se empregarán na reurbanización da contorna da concatedral de San Xiao. A Administración local destina a esta obra máis de 4 millóns de euros

O Concello de Ferrol está a avanzar na reurbanización e humanización da rúa Igrexa, unha intervención á que destina máis de 4 millóns de euros. Tras o inicio esta semana da retirada de pedra histórica da beirarrúa da marxe das vivendas polo quinteiro de San Diego con Arce, o Concello vai iniciar a próxima semana a base de formigonado neste tramo, e avanzará por quinteiros a medida que se retiren as pedras, tal e como anunciou o concelleiro de Urbanismo, Julián Reina, quen lembrou que esta beirarrúa ampliarase ata os 4 metros de ancho.

O edil explicou que a comezos de febreiro, unha vez rematada esta fase de formigonado da beirarrúa, está previsto o inicio da colocación das novas lousas de granito que lucirán ao longo de marxe das vivendas. As primeiras unidades xa forman parte do material almacenado na zona de acopio e as pezas que se están a retirar se empregarán na reurbanización da contorna da concatedral de San Xiao prevista no proxecto.

Por outra banda, continúa avanzando a construción da base de formigón na calzada dos quinteiros da rúa Igrexa. O Concello de Ferrol comezou esta semana este labor no terceiro desde San Diego, é dicir, entre Méndez Núñez e Sánchez Barcáiztegui, que consiste no volcado deste material sobre unha malla de ferro e a súa estabilización cunha regra niveladora. O edil lembrou que a humanización da rúa Igrexa contempla un “importante” aporte vexetal coa plantación de 130 novas árbores.

Con motivo do progreso da obra, está pechado ao tráfico rodado o cruce de Igrexa con Sánchez Barcáiztegui, polo que os vehículos que circulen por esta última vía deben xirar á dereita por Magdalena. Ademais, os coches que salgan á rúa Igrexa desde o estacionamento do mercado da Magdalena sairán pola rúa Sánchez Barcáiztegui en dirección subida ata a rúa Magdalena, onde deberán xirar á esquerda.