Web Municipal do Concello de Ferrol

Inicio Concello De actualidade Novas

Comparte esta páxina

sábado, 21 de xaneiro de 2023

O alcalde comprobou no Ministerio para a Transición Ecolóxica a situación do trámite ambiental da fábrica de bloques de Navantia

Ángel Mato visitou a Subdirección Xeral de Avaliación Ambiental, departamento que tramita o procedemento, e reuniuse co seu secretario, Santiago Martínez, ao que ofreceu a colaboración do Concello de Ferrol para actuar como interlocutor antes aos diferentes organismos autonómicos e locais que deben emitir informes, dada a importancia de axilizar a entrega dos documentos para acurtar prazos

O alcalde, Ángel Mato, visitou o pasado xoves o Ministerio para a Transición Ecolóxica e o reto demográfico co fin de comprobar a situación na que se atopa a avaliación de impacto ambiental da futura fábrica de bloques de Navantia. O departamento con competencias sobre a avaliación ambiental estratéxica de proxectos de competencia estatal é a Subdirección Xeral de Avaliación Ambiental, que nestes momentos está reunindo os informes preceptivos para finalizar o que é o último paso antes da posta en marcha das obras. Mato reuniuse co seu secretario, Santiago Martínez, con quen analizou o punto no que se atopa o procedemento, e ofreceulle a colaboración do Concello de Ferrol á hora de traslaarlles ás Administracións, organismos e entidades de ámbito autonómico e local que aínda non presentaran eses documentos a importancia de axilizar a súa entrega para que, tal como está previsto, as obras poidan comezar en primavera.

O rexedor ferrolán destacou que aínda que se trata dun proxecto no que o Concello non ten ningunha competencia, por non estar suxeito a licencia municipal, “por suposto que é do máximo interese para a cidade, e o goberno local está atento a calquera aspecto no que poida prestar o seu apoio para axilizalo”.

Mato destacou que ao longo dos últimos anos Navantia “foi dando pasos moi firmes para a súa modernización, recuperando carga de traballo e sentando as bases do seu futuro”, algo do que, dixo, “xa se están a ver bos resultados, pero aínda van mellorar moito máis”. O alcalde valorou tamén o “firme compromiso do Goberno” coa empresa pública.

Os Orzamentos Xerais do Estado para este ano inclúen, de feito, unha partida de 56 millóns de euros para a execución dos traballos. Esa cifra representa máis da metade do investimento total previsto para unha actuación declarada de interese xeral polo Ministerio de Defensa, xa que afecta á defensa nacional. Ese é o motivo polo que non está sometida á obtención de licencia municipal.

As novas instalacións construiránse nunha parcela situada xunto ás gradas do estaleiro, que afianzará así o seu salto á industria 4.0. Segundo ten manifestado a empresa pública, os prazos que se manexan son de arredor de tres anos, o que posibilitaría que a nova fábrica de bloques estivera operativa durante a construción da segunda unidade da serie de fragatas F-110.