Web Municipal do Concello de Ferrol

Inicio Concello De actualidade Novas

Comparte esta páxina

venres, 20 de xaneiro de 2023

O Concello concede á empresa encargada de executar a rehabilitación do pazo municipal unha prórroga de seis semanas

O concelleiro de Urbanismo, Julián Reina, explicou esta mañá tras a celebración da Xunta de Goberno Local de hoxe que os informes técnicos abalan a ampliación ata o 3 de marzo por mor das intensas choivas dos últimos días. A intervención conta cun orzamento de 562.650,00 euros (ive incluído), que sufraga a Deputación da Coruña nun 80% a través do Plan de Obras e Servizos POS+Adicional 1/2019

O Concello de Ferrol vén de conceder á empresa que executa a rehabilitación do pazo municipal unha prórroga de seis semanas para rematar os traballos, é dicir, ata o 3 de marzo. O concelleiro de Urbanismo e voceiro do goberno local, Julián Reina, explicou tras a aprobación de dita ampliación na Xunta de Goberno Local celebrada esta mañá que os informes técnicos abalan a concesión tendo en conta as intensas choivas das últimas datas.

O edil puntualizou que desde principios de novembro rexistráronse preto de 40 días de precipitacións de xeito case continuado na zona de Ferrol, o que condicionou o transcurso das obras, como a execución de traballos de reparación en certas zonas da fachada para o seu posterior pintado. O mal tempo tamén alargou os tempos necesarios para o secado das diferentes capas nas que se traballou e dificultou o inicio de novas fases de pintura. Tamén indicou que nos días de forte temporal foi necesario suspender os traballos.

A rehabilitación do pazo municipal conta cun orzamento de 562.650,00 euros (ive incluído), que sufraga a Deputación da Coruña nun 80% posto que está incluída no Plan de Obras e Servizos POS+Adicional 1/2019. O concelleiro lembrou que se trata dunha intervención “moi necesaria para garantir a seguridade no inmoble debido aos danos na última planta do edificio”. Por elo, unha vez rematada a obra “poderanse aproveitar mellor os espazos ata agora sen uso por mor do seu mal estado”. Deste modo, o pazo municipal “será máis funcional para todos”, apuntou.