O alcalde, Ángel Mato, e o director de Operacións e Mantemento de Alsa, Javier Martínez Prieto, asinaron esta mañá en Madrid, no marco de Fitur, un protocolo de colaboración coa intención de renovar este servizo. A falta de definir algúns detalles, prestaríase de xeito similar ao do 2022 e, como entón, sería de carácter gratuíto para os usuarios. O obxectivo é que entre en funcionamento o sábado 1 de abril, coincidindo coa disputa do partido Racing-San Fernando, e se prolongue ata o día 9, Domingo de Resurrección. Deste xeito, ofrecerase ás persoas que visiten Ferrol no seu vehículo particular unha alternativa de estacionamento cómoda, ao tempo que se libera tráfico no núcleo urbano durante unha época do ano na que se rexistra unha gran afluencia de xente. 

Tanto o alcalde coma o director de Operacións e Mantemento de Alsa coincidiron en que a boa experiencia do ano pasado invita a pensar en que nesta ocasión se poderá incrementar o número de usuarios e consolidar así unha iniciativa con vocación de continuidade. 

Ambos sinalaron que iniciativas como esta contribúen a fomentar o uso do transporte público e a desconxestionar o centro da cidade, para convertelo nun espazo urbano máis amable e con menos fumes e ruídos. 

Durante a Semana santa do 2022, os buses lanzadeira entre o aparcadoiro da Malata e a praza de Galicia prestaron o servizo cunha frecuencia de 15 minutos entre as 8.00 e as 22.00 horas, con ampliación de horario ata a 1.00 o xoves e o venres, ata as 2.00 o sábado e ata as 0.00 o domingo. O percorrido incluía unha parada en Ferrol Vello. Os dous vehículos que se empregaron contaban con 90 prazas cada un.