O concelleiro de Urbanismo, Julián Reina, visitou esta mañá o avance da obra nesta importante vía do barrio da Magdalena e explicou que as pezas que se están a retirar se están a enumerar para empregarse na reurbanización que se levará a cabo na contorna da concatedral de San Xiao. A medida que se retiran no primeiro quinteiro, no espazo das beirarrúas repoñeranse as conexións, iniciaranse as tarefas de relleno ata alcanzar a cota óptima e construirase a base de formigón previa á colocación dos novas lousas. 

Por outra banda, continúa avanzando a construción da base de formigón ao longo dos quinteiros da rúa Igrexa. O Concello de Ferrol comezou esta semana este labor no terceiro desde San Diego, é dicir, entre Méndez Núñez e Sánchez Barcáiztegui, que consiste no volcado deste material sobre unha malla de ferro e a súa estabilización cunha regra niveladora. 

Con motivo do progreso da obra, está pechado ao tráfico rodado o cruce de Igrexa con Sánchez Barcáiztegui, polo que os vehículos que circulen por esta última vía deberán xirar á dereita por Magdalena. Ademáis, os coches que salgan á rúa Igrexa desde o estacionamento do mercado da Magdalena sairán pola rúa Sánchez Barcáiztegui en dirección subida ata a rúa Magdalena, onde deberán xirar á esquerda.

O concelleiro indicou esta mañá que a humanización da rúa Igrexa está a avanzar “aínda que a climatoloxía das últimas datas no está a acompañar” e lembrou que o Concello está a destinar a esta intervención máis de 4 millóns de euros co obxectivo de “converter esta rúa en máis atractiva e amable para os nosos veciños e mellorar o entorno no que vivimos”. A intervención inclúe un gran aporte vexetal, con 130 novos árbores ao longo da nova beirarrúa, no lateral das vivendas.