Para incrementar a participación de persoas vestidas de época, desde o Concello de Ferrol estase a promover ditos obradoiros de costura en colaboración coa asociación de veciños de Caranza, que cedeu o seu espazo destinado aos cursos de corte e confección para a realización dos talleres ilustrados, tal e como explicou a edil de Patrimonio Histórico, Eva Martínez Montero. O pasado xoves celebrouse a primeira sesión dos obradoiros no local situado na rúa Alcalde Quintanilla, L8 baixo 4, veciñal 2 (edificios rosas). Terán lugar os xoves de xaneiro, febreiro e marzo, de 17 a 20 horas. As persoas interesadas en participar poden acudir sen inscrición previa. Formáronse dous grupos, un de 17 a 18.30 horas e outro de 18.30 a 20 horas. 

A xastra de series tan exitosas como ‘Rapa’, Beatriz Sieira, é a encargada de impartir estas clases de costura, que pretenden promover que unha gran parte da cidadanía participe neste festival vestida de época. Integrantes da propia entidade veciñal ou da rondalla Só Elas xa están a traballar na elaboración de traxes, ademais de usuarios do centro de día de Caranza. A concelleira visitou este local a pasada semana e comprobou como o centro transformou unha das súas salas nun taller de costura, no que 13 dos seus usuarios —doce mulleres e un home— traballaban “con entusiasmo e destreza” na confección de bolsos, chales e chapeus. 

Tras a visita, Martínez Montero destacou a implicación deste centro de día en “todas as actividades que organiza o Concello de Ferrol, sobre todo aquelas que teñen que ver coa posta en valor da nosa identidade, da nosa cultura e do noso patrimonio”. Tamén agradeceu o “esforzo” realizado por este grupo de persoas maiores para elaborar traxes para un festival que “pretende converterse nun referente cultural, turístico e de lecer á altura do Arde Lucus (Lugo) ou dá Feira Franca (Pontevedra)”. A edil deu as grazas á asociación veciñal de Caranza por “ofrecer as súas instalacións para desenvolver os talleres e participar de forma activa no seu desenvolvemento”.