mércores, 11 de xaneiro de 2023
Germán Costoya entregoulles os certificados de soporte vital básico e desfibrilación automática aos operarios do mercado de Recimil que fixeron o curso promovido polo Concello
Tras a instalación de desfibriladores semiautomáticos, ofrecéuselles aos profesionais a posibilidade de formalos no seu manexo e en situacións de emerxencias
O concelleiro de Mercados, Germán Costoya, entregoulles esta mañá os seus certificados aos operadores do mercado de Recimil que participaron no curso de soporte vital básico e desfibrilación automática promovido polo Concello de Ferrol. Despois da instalación de seis desfibriladores automáticos nos mercados municipais, no Centro Torrente Ballester, na Biblioteca e no propio Concello, a cidade conta xa con 40 dispositivos repartidos por diferentes dependencias municipais.
Para avanzar no obxectivo de converter Ferrol en cidade cardioprotexida, a
iniciativa foi acompañada dunha oferta formativa para os operadores dos mercados,
“que están a responder con moito interese”, destacou o edil. O curso, que consta de oito
horas, conta co aval do Plan Nacional de Resucitación Cardiopulmonar e da Sociedade
Española de Medicina Intensiva, Crítica e Unidades Coronarias.
Na actualidade, Ferrol conta con desfibriladores semiautomáticos (DESA) tamén
no Teatro Jofre, no Auditorio, nos campos de fútbol de Aneiros, A Gandara e de
Caranza, no Club de Remo da Cabana, no estadio da Malata, nos pavillóns da Malata,
na Casa do Deporte, no pavillón de Esteiro, en FIMO, no pavillón do Inferniño e no
polideportivo Gómez Noia. A Agrupación de Voluntarios de Protección Civil de Ferrol conta con outras dez unidades e o servizo municipal de praias, que se encarga do
socorrismo na tempada estival, con outros nove.
