A concelleira lembrou que o grupo municipal socialista levou a pleno no mes de outubro a necesidade de ampliar o número de prazas do servizo a través dunha moción para mellorar a calidade de vida das persoas maiores de Ferrol que foi aprobada por unanimidade. 

Na actualidade, o Concello de Ferrol está a traballar na addenda ao convenio entre ambas partes que o goberno local levará ao pleno deste mes. Unha vez aprobada, incorporarase ao convenio en vigor e poderanse tramitar novas altas. 

O programa está financiado polo Concello de Ferrol, o Consorcio e o usuarios e garante a entrega no domicilio do xantar para os sete días da semana con menús completos e equilibrados supervisados por especialistas en nutrición. Cubre as necesidades básicas de alimentación de persoas maiores ou dependentes da cidade que requiren axuda para a preparación da comida —ben por ter limitada a súa autonomía persoal, por carecer de apoios familiares ou por estar en exclusión social— proporcionándolles unha atención adaptada ás súas necesidades. É unha “satisfacción ir dando pasos que supoñan melloras tan importantes na calidade de vida dos nosos veciños”, indicou a edil, quen lembrou que Ferrol “é unha cidade tremendamente envellecida á que se suman circunstancias aínda complicadas no eido da pandemia”. O fin do goberno local “é coidar aos nosos veciños máis vulnerables” e engadiu que o programa ‘Xantar na Casa’ “contribúe a atrasar ou evitar o ingreso nun centro residencial”.