Novas

sábado, 07 de xaneiro de 2023

Ángel Mato, na festividade de San Xiao: “Ferrol está no inicio dun período de gran dinamismo que debe servir para asentar o seu futuro a longo prazo”

O alcalde presidiu esta mañá o acto institucional no Teatro Jofre. O alcalde lembrou que o potencial da cidade púidose ver “estes últimos días, durante os que milleiros de persoas se apropiaron do centro urbano con total naturalidade para gozar dunha das épocas máis especiais do ano, o Nadal”. Resaltou que Ferrol “ten magníficas perspectivas en canto a emprego industrial, o motor da nosa economía”. Todo isto “debe servir para seguir asentando na cidade coñecemento, retendo o talento e ofrecendo posibilidades de futuro á xente máis nova”


Ángel Mato, na festividade de San Xiao: “Ferrol está no inicio dun período de gran dinamismo que debe servir para asentar o seu futuro a longo prazo”

O alcalde de Ferrol, Ángel Mato, presidiu esta mañá no Teatro Jofre o acto oficial pola festividade de San Xiao, no que se consolidou a irmandade entre as cidades de Lugo e Ferrol e entregáronse o título de Ferrolán do Ano ao catedrático de Microbioloxía e decano da Facultade de Bioloxía da Universidade de Santiago de Compostela (USC) Jesús López Romalde (Ferrol, 1964) e as Insignias de Ouro 2022 aos centros educativos A Laxe, de Valón, e Jesús Maestro, á Asociación de Persoas Xordas de Ferrolterra, ao equipo Abeconsa Basketmi e a Rafael Pillado.


Na súa intervención, o alcalde lembrou que “reunímonos de novo para estreitar os lazos que nos unen coa cidade irmá de Lugo e para homenaxear a persoas e entidades que contribuíron e contribúen a construír Ferrol”. Ambas cidades “atópanse neste momento, como outras moitas cidades que apostan forte pola súa modernización, na materialización dun modelo que ten como obxectivo algo tan simple, e tan complicado ás veces, como é acadar a mellora da calidade de vida das persoas”. 

O potencial de Ferrol púidose ver “estes últimos días, durante os que milleiros de persoas se apropiaron do centro urbano con total naturalidade para gozar dunha das épocas máis especiais do ano, o Nadal”. Esa “vitalidade que exhibiron as nosas rúas é o reflexo do que está a acontecer na cidade a todos os niveis”, apuntou. Ferrol “está no inicio dun período de gran dinamismo que debe servir para asentar o seu futuro a longo prazo”. 

Actividade asegurada no ámbito naval
A principal industria da cidade, a naval, lembrou Mato, “ten asegurada a súa actividade co desenvolvemento de novos programas e coa continua apertura de mercados nas súas diferentes unidades produtivas”. O programa de construción “máis ambicioso da historia recente da Armada xa está en marcha no estaleiro” e durante este ano a área de Reparacións “demostrou as súas capacidades e a propia cidade notou o impacto que teñen para a economía local encargos como o que asumiu para unha multinacional canadiense”. 

Por outra banda, a comarca “é cada vez máis líder nun sector tan estratéxico coma o das renovables, tanto na construción de instalacións para a eólica mariña como na incipiente sector do hidróxeno verde, con varios proxectos nos que xa están implicadas algunhas das empresas enerxéticas máis importantes”. En resumo, dixo Mato, Ferrol “ten magníficas perspectivas en canto a emprego industrial, que é o motor da nosa economía”. Todo isto “debe servir para seguir asentando na cidade coñecemento, retendo o talento e ofrecendo posibilidades de futuro á xente máis nova”. Basta pensar, dixo, que en “pouco espazo de tempo se conseguiron tres centros de excelencia industrial na cidade e comarca, un no CIS, outro en Navantia Ferrol e outro en Navantia Fene”. “Destacadas empresas de enxeñaría e tecnolóxicas están abrindo sedes en Ferrol”. 

Agora, un polo I+D
O alcalde tamén fixo referencia ao novo de I+D en enerxías renovables e almacenamento que se vai crear ao abeiro dos Fondos de Transición Xusta e polo que “nestes momentos estamos traballando para que se asente na cidade”. 

Neste ámbito, lembrou que “as UMIs Navantia-Universidade teñen xa unha sede estable en Ferrol”. O campus industrial de Ferrol “é xa unha referencia para este tipo de estudos, con oito grados distintos en enxeñaría e coa consolidación dunha titulación de xestión industrial da moda”. Tanto nese ámbito coma no urbano e social “estamos sentando as bases do futuro de Ferrol, e ese futuro é moi prometedor”. Para rematar, o alcalde apuntou que Ferrol ten “moitas razóns para confiar nas nosas capacidades e en que saberemos aproveitar esta oportunidade. Só temos que crelo e traballar unidos”. 

Pola súa banda, a alcaldesa de Lugo, Lara Méndez, destacou a transformación que están a vivir ambas cidades. Unha transformación, dixo, que na urbe que dirixe pasa por un cambio físico sempre tendo en conta a sustentabilidade co obxectivo de camiñar cara unha cidade para as persoas, empática e inclusiva. A rexedora tamén fixo referencia á creación de emprego e á transformación económica en Lugo, “aproveitando as oportunidades, instrumentos e materia prima que temos”. 

Entrega de distincións
A continuación, o alcalde de Ferrol repasou a traxectoria dos galardoados no día de hoxe. En primeiro lugar, lembrou que a corporación municipal quixo recoñecerlle a súa traxectoria sindical, política e vital a Rafael Pillado non só pola súa valía e polos seus méritos persoais. “Tamén se decidiu así porque é un verdadeiro símbolo da loita polas liberdades, e este ano que acaba de rematar conmemoramos o 50.º aniversario dos sucesos do 10 de marzo de 1972”. Durante toda a súa vida “destacouse na defensa dos dereitos dos traballadores, e esa tarefa continúa aínda hoxe”, apuntou Mato. Pola súa banda, Pillado agradeceu ao Concello de Ferrol “un recoñecemento que se suma aos actos polo 50.º aniversario dossucesos do 10 de marzo de 1972”. A insignia de ouro “valora o mundo do traballo” e especialmente “o esforzo e sacrificio desenvolvido nos últimos anos en defensa das liberdades”. Pillado tamén agradeceu o cariño recibido por parte da sociedade ferrolá. 

A directora do colexio A Laxe, Patricia María Cons, recibiu a insignia de ouro concedida ao centro en recoñecemento a un destacado traballo en pro da inclusión e do desenvolvemento de todo o alumnado. O ensino das nenas e dos nenos “vai moito máis alá da simple adquisición de coñecementos, e iso é precisamente o que vén demostrando este colexio a través da estimulación das capacidades concretas das alumnas e dos alumnos”, expresou Mato. A directora, pola súa banda, agradeceu o recoñecemento do Concello de Ferrol e destacou o “ambiente familiar e a estreita relación entre alumnado e familias”. O centro, dixo, “desenvolve as potencialidades dos alumnos, con multitude de programas e un equipo docente moi comprometido”. 

Tamén o CPR Jesús Maestro recibiu a insignia de ouro 2022, que hai xa 75 anos, en plena posguerra, puxo en marcha na cidade un modelo que perseguía mellorar a calidade educativa en tempos difíciles. Hoxe, lembrou o alcalde, o colexio segue un sistema pedagóxico no que destacan o plurilingüismo e as tecnoloxías da información e a comunicación. A súa directora, María Begoña Alguacil, quen agradeceu un galardón que “é para as familias, o profesorado e o alumnado, é dicir, para toda a familia do centro”, expresou que o recoñecemento é un “estímulo” para seguir desenvolvemento o labor educativa.  

Hoxe tamén se celebrou o aniversario, neste caso os 50 anos, da Asociación de Persoas Xordas de Ferrolterra, representada no escenario pola súa presidenta, Teresa Gallo. Son “cinco décadas de traballo permanente en pro dos dereitos das persoas xordas, na defensa da igualdade e na visibilización da súa cultura e o fomento da súa lingua propia”, lembrou o alcalde. Pola súa banda, Gallo agradeceu ao Concello de Ferrol o recoñecemento, que servirá para visibilizar ás persoas xordas e o esforzo da entidade. É, dixo, como un “tesouro”. 

Sobre o Basketmi, o alcalde lembrou que se trata dun clube nacido para fomentar a práctica deportiva entre as persoas con discapacidade e que ao longo da súa traxectoria acadou destacados éxitos, coma o primeiro posto na Primeira división de baloncesto adaptado. Na actualidade “só existen en Galicia dous equipos desta disciplina, e é un orgullo que un deles represente a Ferrol”, indicou. O seu presidente, Álvaro Illobre, agradeceu a insignia de ouro e mencionou a loita, o esforzo, a humildade como valores do club, e sobre todo a familia que forma. 

Finalmente, a corporación acordou concederlle o título de Ferrolán do Ano a Jesús López Romalde, decano da Facultade de Bioloxía da Universidade de Santiago dende hai algo menos dun ano. Os seus traballos sobre a detección de virus en augas residuais “foron moi importantes para seguir a evolución da pandemia da covid en España”, lembrou Mato. Durante a súa carreira acadou importantes premios científicos, entre os que se conta a Medalla Ángeles Alvariño, que lle entregou recentemente a Academia Galega de Ciencias. 

Jesús López Romalde “é unha mostra destacada dese talento ao que me refería antes”. Do talento “que esta cidade xerou ao longo da súa historia e que, máis que nunca, aspiramos a reter entre nós para que Ferrol ocupe o lugar que merece”, indicou o rexedor. Pola súa banda, Romalde agradeceu a distinción e lembrou a súa infancia na cidade e a súa vocación de ser biólogo. “É unha honra” ser Ferrolán do Ano, un “acicate” para traballar con máis esforzo e “desde hoxe levarei con moita honra o compromiso de ser embaixador da cidade máis alá da nosa terra”. O acto rematou coa actuación musical a cargo de Sabela King & The Heartbreakers.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar