Novas

luns, 02 de xaneiro de 2023

A programación de Nadal continúa na carpa de Armas con varias sesións de cine, xogos de mesa, obradoiros, ludoteca e un campionato de twister

Hoxe luns proxectarase ‘Canta 2’, mañá martes ‘Polar Express’ e o mércores ‘Los Goonies’, todas ás 19 horas. Tamén haberá animación con pasarrúas en diferentes barrios. O servizo de ludoteca mantense ata o sábado día 7


A programación de Nadal deseñada polo Concello de Ferrol continúa esta semana na carpa da praza de Armas con multitude de actividades. Hoxe luns, 2 de decembro, ademais de servizo de ludoteca e pasarrúas, pola tarde proxectarase na carpa de Nadal a película ‘Canta 2’, ás 19 horas (inicialmente estaba prevista ‘Polar Express’, que se poderá ver mañá martes). Esta tarde, de 16 a 19 horas, haberá obradoiro de instrumentos, danza e xogos tradicionais. 


As propostas para estes días continúan mañá martes, 3 de xaneiro, co servizo de ludoteca de 11 a 13.30 horas e de 17 a 20.30 horas. Pola mañá volverá a animación ás rúas de Ferrol co pasarrúas ‘Personaxes de Disney’, que estará en Ultramar de 11.45 a 12.30 horas; en Catabois de 12.45 a 13.30 horas; en Canido de 17.30 a 18.40 horas e no barrio da Magdalena de 18.50 a 20 horas. 

A actividade na carpa volverá pola tarde, de 16 a 19 horas, con xogos de mesa en familia e un campionato de twister. A xornada rematará coa proxección ás 19 horas da película ‘Polar Express’ (en lugar de ‘Canta 2’, que se proxecta hoxe luns). 

Obradoiros de Nadal e showcooking do restaurante Frank para o mércores 
O programa para Nadal inclúe para o mércores novas actividades, como pasarrúas a cargo de ‘Paxes reais e panxoliñas’ por Canido de 11.45 a 12.30 horas; en A Magdalena de 12.45 a 13.30 horas; en Ultramar de 17.30 a 18.40 horas e por Catabois de 18.50 a 20 horas. Pola tarde, de 16 a 18 horas a carpa de Nadal da praza de Armas acollerá un obradoiro de balde de coroas, cartas e caixa de correos xigante e de 18 a 19 horas un showcooking a cargo de Gonzalo Pérez e Blanca Tello, do restaurante Frank. O mércores haberá unha nova sesión de cine, ás 19 horas, co filme ‘Los Goonies’ e o servizo de ludoteca estará operativo de 11 a 13.30 horas e de 17 a 20.30 horas. 

Pode consultarse toda a programación de Nadal para o resto da semana en https://www.ferrol.gal/nadal/

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar