luns, 05 de decembro de 2022
O Concello estrea no Cantón a ‘Paxareira do Nadal’, cunha gran árbore, preto de 90 flores de pascua, 8 abetos naturais, un gran belén, crebanoces de madeira e multitude de adornos típicos destas datas
O alcalde, Ángel Mato, visitou esta mañá o novo atractivo de Nadal e conversou cos veciños que se atoparon ao Cantón para gozar dos seus rechamantes elementos. Conta tamén cun Papá Noel, renos, cans husky, osos polares e bolas e bonecos de neve, entre outros adornos
O Concello de Ferrol estreou esta mañá no Cantón de Molíns a ‘Paxareira do Nadal’, un novo atractivo de Nadal que se suma ao alumeado e aos grandes elementos de luz repartidos polo centro da cidade. Neste caso, o Concello vén de dotar de multitude de adornos de Nadal ao espazo acristalado da Alameda de Suances, cunha gran árbore elevada ata os preto de 4 metros de alto como elemento central.
O alcalde, Ángel Mato, acompañado pola concelleira de Obras e Servizos, Ana
Lamas, visitou esta mañá a nova ‘Paxareira do Nadal’ e conversou cos veciños que se
atoparon ata o Cantón para gozar dos seus rechamantes elementos. Rodean a árbore oito
abetos naturais e preto de 90 flores de pascua —entre vermellas e brancas—, un
nacemento de gran tamaño, tres crebanoces de madeira de diferentes tamaños —o de
maior dimensión con movemento—, unha familia de cans husky, osos polares, bonecos e bolas de neve, farois, renos, e un gran Papá Noel, entre outros elementos, todos eles
alumeados con preto de 18.000 bombillas led, de baixo consumo.
Unha gran árbore co mensaxe
Entre a multitude de adornos de Nadal que colgan da gran árbore que preside a nova
‘Paxareira de Nadal’ hai repartidas ata 23 palabras en madeira branca, como Esperanza,
Amistade, Paz, Nadal, Ilusión, Unión ou Igualdade. Este novo atractivo de Nadal poderá
visitarse ata o día 7 de xaneiro incluído.
