Novas

luns, 05 de decembro de 2022

O goberno local aproba o proxecto de reurbanización do primeiro tramo da estrada de Castela

A proposta, que supera os 2,2 millóns de euros, conta con beirarrúas de máis de oito metros e unha fonte ornamental de gran tamaño nunha nova rotonda que se crearía na intersección coas avenidas da Paz e das pías. O voceiro, Julián Reina, explicou que, dos case 21 millóns que o Concello tiña solicitado para actuacións de rehabilitación urbana con cargo ao Plan de Recuperación, Transformación e Resiliencia, a Xunta unicamente concedeu 3,5 millóns


O goberno local aproba o proxecto de reurbanización do primeiro tramo da estrada de Castela

A Xunta de Goberno Local aprobou hoxe un ambicioso proxecto de reurbanización do primeiro tramo da estrada de Castela, o comprendido entre a praza de España e a praza do Inferniño. Trátase dunha operación cofinanciable polo Fondo Europeo de Desarrollo Regional (Feder) no marco do Programa Operativo Plurirregional de España Feder 2014-2020 ao abeiro da Estrategia de Desarrollo Urbano Sostenible e Integrado (Edusi) “Ría de Ferrol, Cidade 2020”, cun orzamento estimado para a execución das obras que ascende a 2.206.933, 22 euros (IVE incluído). O prazo de execución estimado é de 18 meses. 


“O obxectivo deste proxecto é crear un novo eixo vertebrador entre as dúas prazas. A actual rúa, que nalgúns tramos conta con cinco carrís para o tráfico, convertiríase nunha avenida con beirarrúas de entre oito e nove metros para uso e goce dos peóns”, explicou o voceiro do goberno local, Julián Reina, na súa comparecencia posterior á reunión da Xunta de Goberno. Implantaríase un carril bici para unir a praza de España, a do inferniño e o parque de Esteiro e tamén se contempla a reordenación das interseccións para potenciar a conexión de Recimil co Ensanche e coa FE-14. 

O proxecto inclúe tamén a plantación de novas árbores de gran porte, unha nova iluminación con tecnoloxía LED, a renovación dos servizos e o soterramento dos cables. Ademais, renovaríanse todos os pavimentos e o mobiliario urbano de acordo coas características do que existe no resto da estrada de Castela. 

Un dos elementos máis destacados é a instalación dunha gran fonte ornamental na nova rotonda de encontro coa avenida da Paz e a avenida das Pías. No deseño, a pía central está enmarcada por dous arcos metálicos de 8,5 metros de altura, a cuxo pé se sitúan rótulos coa imaxe corporativa de Ferrol cunha lonxitude de 5 metros. 

Cabalgata de reis
Reina informou tamén de que a Xunta de Goberno acordou a adxudicación da produción e execución da Cabalgata dos Reis Magos de 2023 por importe de 108.272,88 euros, IVE incluído. Segundo avanzou, as carrozas dos Reis xirarán en torno a temáticas moi recoñecibles polos máis pequenos, como son os mundos de Harry Potter, Hansel e Gretel ou o Rei León. Ademais das tres carrozas reais, haberá outras cinco de diversas temáticas. “O percorrido será similar ao habitual, pero nos vindeiros días, en canto se formalice o contrato, definiranse os detalles finais coa empresa adxudicataria en canto a horarios e á recepción dos Reis ás nenas e aos nenos”, detallou o concelleiro. 

Rehabilitación 
Finalmente, o portavoz explicou que o goberno local aprobou o pasado xoves, en reunión extraordinaria, a participación do Concello de Ferrol no programa de axuda ás actuacións de rehabilitación a nivel de barrio do Plan de Recuperación, Transformación e Resiliencia, e a remisión da documentación correspondente ao IGVS, que se encarga do reparto dos fondos achegados polo Goberno central. Julián Reina lembrou que a Xunta de Galicia anunciaba a semana pasada que se lle concederon a Ferrol 3,5 millóns de euros para rehabilitación ao abeiro deste programa, pero que a cantidade que tiña solicitada o Concello era de 20,9 millóns, debido ao dinamismo do mercado da rehabilitación na cidade. 

Esa sexta parte distribuirase entre A Magdalena-Ferrol Vello (1.516.073,08 euros), Esteiro Vello (378.150 euros), Recimil (963.000 euros) e A Graña (90.900 euros). Froito deste programa, os tres primeiros contarán tamén con 227.410,96 euros, 56.722,50 euros e 133.343,46 euros para obras de reurbanización. O resto do importe asígnase a sufragar os equipos técnicos.




Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar