Novas

luns, 05 de decembro de 2022

O Concello celebrará do 14 ao 18 de decembro a II Semana do Patrimonio Invisible de Ferrol con máis espazos e prazas respecto ao pasado ano

A edil de Benestar Social, Eva Martínez Montero, indicou que tras o éxito da pasada edición, esta vez durará un día máis, poderán visitarse ata 10 espazos (2 máis que en 2021) e ampliarase o número de prazas, de 360 a 525 para este ano. Indicou que o obxectivo é “achegar aos ferroláns espazos cun valor patrimonial, histórico e cultural totalmente único e indiscutible habitualmente inaccesibles para o público”. A reserva habilitarase o día 9 de decembro, a partir das 17 horas, a través da web patrimonioinvisible.gal


O Concello celebrará do 14 ao 18 de decembro a II Semana do Patrimonio Invisible de Ferrol con máis espazos e prazas respecto ao pasado ano

 O Concello de Ferrol vai celebrar a segunda edición da Semana do Patrimonio Invisible de Ferrol entre os días 14 e 18 de decembro con máis visitas, máis prazas e máis días, segundo explicou esta mañá a concelleira de Patrimonio Histórico, Eva Martínez Montero, durante a presentación do programa, que será totalmente de balde para o público. 


A edil lembrou que tras o éxito da iniciativa o pasado ano, cando se esgotaron as estradas en media hora, este ano o Concello suma un día máis ao programa de visitas, amplía o número de espazos, dos 8 do pasado ano a 10, e suma 165 prazas máis, o que fan que este ano se oferten un total de 525, todas de balde. A reserva habilitarase o venres 9 de decembro, a partir das 17 horas, a través da web patrimonioinvisible.gal

Martínez Montero indicou que o obxectivo é “achegar aos ferroláns espazos cun valor patrimonial, histórico e cultural totalmente único e indiscutible habitualmente inaccesibles para o público”. Esta iniciativa, dixo, “está na liña deste goberno de poñer en valor e promover o noso rico patrimonio histórico”.

Seis espazos novos respecto á primeira edición 
A edil, acompañada por César Abella, coordinador do evento, indicou que a II edición da Semana do Patrimonio Invisible abrirá as portas dun total de 10 espazos, dos que 6 son novidades absolutas. Así, as persoas que participen nesta nova edición poderán descubrir recunchos descoñecidos de edificios como a Cociña Económica, un dos inmobles máis senlleiros do arquitecto Rodolfo Ucha e que na actualidade acolle unha das institución de maior calado e importancia social na cidade. Outra institución que se suma a esta nova edición é o Ateneo Ferrolán, para coñecer toda a historia a traballo feito en prol da cultura galega nos máis de 140 anos de vida. 

Igualmente poderase visitar o Palacio de Capitanía, que abrirá as súas portas para apreciar o interior dunha das grandes xoias do patrimonio arquitectónico ferrolán, e o Cuartel de Dolores e Fontelonga, construído por Sanchez Bort no século XVIII e que aínda conserva o seu uso como cuartel. Percorrerase o Campus de Esteiro para relembrar a transformación urbanística e arquitectónica do que era o antigo Hospital de Mariña en sede da Universidade, unha visita que incluirá algúns dos edificios máis emblemáticos do campus, como a Casa do Patín, a Facultade de Humanidades ou o CITENI. 

Xa fora do ámbito urbano, e localizado nun dos lugares de maior beleza paisaxística de Ferrolterra, a II edición da Semana do Patrimonio Invisible abrirá as portas do Faro de Cabo Prior, edificio que leva en funcionamento dende o ano 1854 guiando coa súa luz e sereas aos mariñeiros que navegan a Costa Ártabra. 

Aos espazos novos súmase a continuidade doutros catro lugares que foron acollidos con moito éxito na pasada edición. É o caso do Arquivo Intermedio Militar do Noroeste, o Casino Ferrolano, o Teatro Jofre e a Estación Naval da Graña. Neste último espazo, e trala extraordinaria demanda do ano pasado, multiplícanse por dous os percorridos, facendo visitas dobres tanto na xornada do sábado como do domingo.



Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar