Novas

venres, 02 de decembro de 2022

O Concello inicia o proceso de selección para o novo Programa Integrado de Emprego, que oferta 100 prazas para desempregados

O plan desenvolverase ata o mes de novembro de 2023


O Concello de Ferrol vai desenvolver durante o presente mes de decembro o proceso de selección para o novo Programa Integrado de Emprego, que oferta un total de 100 prazas para persoas desempregadas. Os interesados en participar poden contactar co Centro municipal de Emprego a través do correo electrónico emprego@ferrol.es, no teléfono 981 944 000 (extensións 693-688) ou no 981 94 41 95. 


O Programa Integrado de Emprego do Concello de Ferrol desenvolverase ata o mes de novembro de 2023. Para participar é necesario estar en situación de desemprego, inscrito como tal no servizo público de emprego de Galicia. 

Co obxectivo da inserción laboral das persoas participantes realizaranse, entre outras accións: información, orientación e asesoramento; formación; técnicas de coaching, intelixencia emocional, e técnicas de motivación para a busca de emprego, tanto por conta propia como allea; habilidades sociolaborais e obradoiros de entrevista; fomento da capacidade emprendedora; prospección empresarial; emparellamento de ofertas de traballo coas persoas demandantes de emprego participantes; prácticas profesionais non laborais en empresas; e obradoiros sobre mobilidade laboral. 

Está contemplada a realización de sete itinerarios formativos: xestión loxística e de almacén; dependente de establecementos comerciais, técnicas de limpeza; auxiliar de reposición e caixa; comercialización e venda de produtos da pesca; actividades básicas de hostalaría; e actividades de apoio á industria e á construción. 

O obxectivo de inserción laboral previsto das persoas que participen no programa é dun 41%. O plan establece o pagamento de 7 euros por día de asistencia ás accións do programa. Os interesados poden atopar máis información en http://www.ferrol.es/emprego/ampliar.aspx?id=663

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar