Web Municipal do Concello de Ferrol

Inicio Concello De actualidade Novas

Comparte esta páxina

venres, 20 de maio de 2022

O Concello sensibilizou en educación viaria aos máis pequenos de Ferrol a través de xogos nun acto celebrado hoxe no Auditorio

O alcalde dirixiuse aos preto de 450 escolares de 11 colexios da cidade nun acto que formou parte das actividades deseñadas polo Concello con motivo da Semana da Seguridade Viaria. Ángel Mato anunciou que o Concello entregará aos centros escolares de Ferrol un xogo xigante da Oca baseado en Ferrol

O Concello de Ferrol continúa cos actos con motivo da Semana da Seguridade Viaria que está a celebrar desde o pasado luns. Tras o espectacular simulacro de accidente grave do pasado martes e o ‘RoadShow’ de onte para concienciar en seguridade viaria á xente moza, hoxe foi a quenda dos máis pequenos, preto de 450 alumnos de educación primaria de 11 colexios da cidade que acudiron ao Auditorio municipal á Gala Escolar da Seguridade Viaria para coñecer en profundidade as normas de circulación a través dun xogo xigante da Oca específico de Ferrol.

O alcalde de Ferrol, Ángel Mato, indicou aos pequenos a importancia de “coñecer e respectar as normas de seguridade polo ben de todos” e animoulles a trasladar aos seus pais o aprendido na Gala. Ademais, anunciou que nos próximos días o Concello vai entregar un exemplar do xogo xigante da Oca a cada centro de Ferrol, tanto público como concertado.

Carreira solidaria para reunir fondos para Stop Accidente e Aesleme

Os actos pola Semana da Seguridade Viaria continuarán esta tarde, coa instalación no Cantón, de 16 a 20 horas, do Parque de Mobilidade Viaria. Mañá pola tarde celebrarase a Carreira Solidaria pola Seguridade Viaria, cuxos fondos destinaranse integramente ás ong Stop Accidentes e Aesleme (Asociación para educar en seguridade viaria e evitar lesións por mobilidade en España).

Por último, o domingo 22 terá lugar unha nova Marcha Ciclista Popular do Concello de Ferrol, neste caso con motivo da I Semana da Seguridade Viaria de Ferrol. Partirá ás 11 horas da Praza de Armas e percorrerá 13,5 quilómetros. Como é habitual, poderán participar tanto nenos como adultos e a inscrición pode facerse minutos antes do inicio. Todos os participantes recibirán como detalle unha pulseira-brazalete reflectora da I Semana da Seguridade Viaria de Ferrol e entre todos sortearase unha bicicleta.