Novas

xoves, 12 de maio de 2022

O Concello celebra esta fin de semana a Mostra Musical do Eixo Atlántico con actuacións de entrada libre no Auditorio e Conservatorio e o tren turístico para conectar o centro urbano con Caranza

Participarán 39 solistas e 8 agrupacións de entre 13 e 18 anos procedentes dunha vintena de municipios de Galicia e o norte de Portugal. A cidade de Ferrol estará representada por catro estudantes de música: dous de piano, un de tuba e outro de arpa. O evento desenvolverase en colaboración co Eixo Atlántico


O Concello de Ferrol continúa coa dinamización da cidade a través de eventos culturais. Tras o recente remate do XXXIII Concurso Internacional de Piano de Ferrol, nesta ocasión, e en colaboración co Eixo Atlántico, o Concello vai celebrar esta fin de semana, os días14 e 15 de maio, a VII Mostra Musical do Eixo Atlántico, unha cita que reunirá na cidade a músicos procedentes de Galicia e o norte de Portugal. 


Trátase dun evento que busca recoñecer, promover, premiar e difundir a práctica e afección á música entre nenos tanto en Galicia como do norte de Portugal. Este ano participarán 39 solistas e 8 agrupacións procedentes dunha vintena de municipios entre ambos territorios. Chegarán a Ferrol estudantes de música de entre 13 e 18 anos e a cidade estará representada por catro: dous estudantes de piano, un de tuba e outro de arpa. 

O evento adoita reunir nunha fin de semana uns 300 estudantes de música dos municipios galegos e portugueses que integran o Eixo Atlántico, ademais de acompañantes. Os concertos terán lugar no Auditorio municipal e no Conservatorio de Música Xan Viaño, ambos centros no barrio de Caranza. 

O acceso será de balde e sen necesidade de retirar entrada. As persoas interesadas en acudir ás actuacións poderán facelo o sábado no Auditorio, de 9.30 horas a 13.30 horas e de 16 horas a 19 horas, e no Conservatorio de 9.30 horas a 13 horas e de 16 horas a 19 horas aproximadamente. O domingo, a partir das 9.30 horas, as actuacións da final terán lugar no Auditorio e o acto de clausura comezará ás 16.40 horas, no mesmo emprazamento.

Tren turístico de balde entre o Auditorio municipal e o centro da cidade 
Co fin de facilitar o traslado ata os centros nos que se va a desenvolver a Mostra Musical e promover que a cidadanía goce da cidade, o Concello de Ferrol vai poñer en marcha o tren turístico municipal durante a fin de semana. Percorrerá de balde o tramo entre a Praza de Galicia e o Auditorio. Partirá desde a Praza de Galicia nos seguintes horarios para ambos días: 9:00, 9:30, 10:00, 10:30, 13:00, 13:30, 14:00, 16:00, 16:30, 17:00 e 17:30 horas. Pola súa banda, sairá desde o Auditorio municipal tanto o sábado como o domingo ás 9:15, 9:45, 10:15, 10:45, 13:15, 13:45, 14:15, 16:15, 16:45, 17:15, 19:00, 19:30 e 20:00 horas. 

Stand no que reservar establecemento para comer ou cenar
O goberno local quere aproveitar este encontro cultural para atraer visitantes á cidade e promover a actividade en todos os ámbitos posibles, neste caso especialmente no eido cultural. A concelleira de Promoción Económica e Turismo, María Teresa Deus, anunciou esta mañá que co fin de activar tamén o sector da hostalería e comercio o Concello vai instalar un stand informativo no Auditorio municipal no que persoal especializado da Asociación de Empresarios de Hostalería xestionará reservas para comer o cenar nos distintos establecementos hostaleiros da cidade. “Queremos dar as máximas facilidades posibles ás persoas que nos visiten esta fin de semana para que gocen e coñezan a cidade”. “Entre o tren turístico gratuíto para os desprazamentos e o apoio á hora de elixir e reservar unha mesa estamos seguros que esta fin de semana vai ser un éxito desde o punto de vista turístico”, apuntou a edil. 



Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar