Novas

mércores, 11 de maio de 2022

O Concello inicia o luns a I Semana da Seguridade Viaria de Ferrol para concienciar a nenos e adultos sobre a gravidade da sinistralidade na estrada

O concelleiro de Seguridade e Tráfico, Germán Costoya, presentou esta mañá o programa de actividades, que incluirá o simulacro dun accidente grave en Esteiro, unha Gala Escolar de Seguridade, unha carreira solidaria e unha marcha ciclista, entre outras actividades. Os día 16, 18, 19 e 20 a Escola municipal de Mobilidade ubicada en FIMO sairá á rúa para achegarse aos nenos da cidade no Cantón, San Xoán, Inferniño e Caranza. Un ‘Road Show’ mostrará a alumnos de ESO, Bacharelato e FP as consecuencias reais das imprudencias na estrada nun evento no que intervirán membros das forzas de seguridade, sanitarios, bombeiros, vítimas de accidentes de tr


O Concello inicia o luns a I Semana da Seguridade Viaria de Ferrol para concienciar a nenos e adultos sobre a gravidade da sinistralidade na estrada

O Concello de Ferrol continúa co labor de concienciar á poboación sobre a necesidade de cumprir coas normas de seguridade viaria coa celebración a próxima semana —entre os días 16 e 22 de maio e coincidindo coa celebración da 7ª Semana Mundial da Seguridade Viaria— da I Semana da Seguridade Viaria de Ferrol, unha cita que pretende concienciar a nenos, precondutores e adultos da gravidade da sinistralidade na estrada e minorar as súas consecuencias para a saúde pública. Para elo, o Concello deseñou un nutrido programa de actividades que esta mañá presentou o concelleiro de Seguridade e Tráfico, Germán Costoya. Inclúe entre outras actividades o simulacro dun accidente grave na avenida de Esteiro, charlas de educación viaria, sacar a Escola municipal de Mobilidade aos barrios da Magdalena, San Xoán, Inferniño e Caranza, unha Gala de Escolar da Seguridade na que participarán arredor de 450 escolares dunha decea de centros da cidade, unha marcha ciclista e unha carreira solidaria pola seguridade viaria en Ferrol. 


Catro horas de formación viaria con xogos nos barrios da cidade
A Escola de Mobilidade do Concello de Ferrol, habitualmente localizada nas instalacións de FIMO, sairá á rúa durante a I Semana da Seguridade Viaria de Ferrol co fin de achegarse á poboación infantil da cidade, que poderá coñecer a través de xogos as sinais e normas de tráfico máis importantes. O luns, 16 de maio, a Escola instalarase de 16 a 20 horas no barrio de Caranza, no aparcamento posterior ao centro cívico. O mércores 18, de 16 a 20 horas, estará no barrio do Ensanche, na praza do Inferniño; o xoves 19, de 16 a 20 horas, instalarse no barrio de San Xoán (na rúa Colombia, perpendicular a estrada de Castela) e o venres 20, tamén de 16 a 20 horas, instalarase no Cantón, no barrio da Magdalena. O edil explicou que o Concello habilitará en ditos espazos circuítos para que os nenos podan conducir pequenos vehículos e coñecer as sinais de tráfico. 

Simulacro de accidente grave cun autobús con pasaxeiros
No labor de dar visibilidade ás consecuencias reais dun accidente de tráfico e de mostrar o traballo coordinado entre todos os axentes implicados na atención dun sinistro deste tipo, o Concello ten programado para o martes 17, de 11 a 13 horas, o simulacro dun accidente grave que terá lugar na Avenida de Esteiro, no tramo entre a glorieta de González-Llanos e a rúa Españoleto, que quedará cortado ao tráfico rodado en ambos sentidos. No sinistro estará involucrado un autobús con pasaxeiros, polo que haberá feridos múltiples. 

O concelleiro anunciou ademais que en paralelo se explicará o desenvolvemento do despregue sanitario e de seguridade a través da megafonía que se instalará ao longo do tramo da avenida. 

Encontro no Auditorio con vítimas e penados por delitos de seguridade viaria
O xoves 19, de 12 a 13 horas, terá lugar no Auditorio municipal un ‘Road Show’ dirixido a precondutores ou xa mozos condutores, é dicir, estudantes de 4º da ESO, Bacharelato e Formación Profesional de centros de Ferrol. Trátase dun evento formativo e preventivo no que intervirán membros das forzas de seguridade (axentes de tráfico especializados en seguridade viaria), sanitarios, bombeiros, vítimas, familiares e persoas penadas por cometer delitos contra a seguridade viaria. 

O que pretende o Concello é que a xente nova de Ferrol coñezan de primeira man “a dura experiencia que supón un sinistro desde todas as vertentes así como as consecuencias reais das imprudencias”, apuntou o concelleiro. O obxectivo é “previr os sinistros de tráfico, especialmente de cara ao verán, para o que é preciso concienciarlles sobre os perigos reais da condución baixo condutas de risco, como o consumo de alcol e drogas”, explicou. Desde o Concello “seguimos incidindo na idea de alcol e drogas cero”.

O Concello entrega un xogo da Oca xigante sobre tráfico a todos os centros 
O Concello tamén quere chegar aos máis pequenos, polo que a I Semana da Seguridade Viaria de Ferrol inclúe unha Gala Escolar da Seguridade Viaria, que terá lugar o día 20, de 12 a 13 horas, no Auditorio municipal. Acudirán arredor de 450 escolares de educación primaria dunha ducia de centros escolares, os que solicitaron participar na iniciativa. Alí poderán aprender normas de seguridade viaria a través, entre outras cousas, dun xogo en grandes dimensións da Oca. Co fin de que a formación e concienciación continúe nas aulas, indicou Costoya, o Concello de Ferrol vai entregar a todos os centros educativos da cidade, tanto públicos como concertos, un exemplar deste xogo. 

Durante esta Gala, ademais, os escolares asistentes visualizarán os diferentes vídeos que os centros participantes gravaron sobre as impresións dos nenos en canto á importancia da seguridade viaria. Esta actividade “non supoñerá custo algún posto que o Concello vai facilitar o servizo de autobús para trasladar aos nenos desde os seus centros educativos”. Tamén o venres 13, ás 13 horas, o Concello ofrecerá unha charla informativa sobre educación viaria aos alumnos do IES Concepción Arenal.

Carreira solidaria para reunir fondos para Stop Accidente e Aesleme 
O concelleiro destacou a “gran relevancia e impacto” dunha das actividades da Semana, a Carreira Solidaria pola Seguridade Viaria de Ferrol que terá lugar o sábado 21, entre as 18 e as 21 horas. Indicou que o diñeiro que se reúna a través das inscricións —5 euros para adultos, nenos de balde— destinarase integramente ás ong Stop Accidentes e Aesleme (Asociación para educar en seguridade viaria e evitar lesións por mobilidade en España). 

A inscrición xa está aberta na web de Carreiras Galegas, no enlace https://bit.ly/3N5FUQN, onde pódese consultar o regulamento da marcha https://bit.ly/3yuA0Vu. O percorrido para adultos será de 5 quilómetros e para nenos segundo a idade. Partirá e rematará desde a Praza de Armas e entre os tres primeiros clasificados, tanto na categoría feminino como masculino, sortearase un paquete de experiencias que inclúe unha noite de hotel en Ferrol para dúas persoas en réxime de aloxamento e almorzo, menú degustación nun restaurante da cidade elixido polo gañador, un lote de exquisitos produtos locais e entradas a museos. No caso dos nenos, todos recibirán unha medalla. 

O edil animou á poboación a participar na carreira, que se poderá desenvolver tanto camiñando como correndo, e que estará coordinada pola Delegación en Ferrol da Federación Galega de Atletismo. O obxectivo, dixo, é concienciar a través desta carreira solidaria “das nefastas consecuencias que ten un accidente de tráfico”. Todos os participantes obterán tamén unha camiseta. 

Por último, o domingo 22 terá lugar unha nova Marcha Ciclista Popular do Concello de Ferrol, neste caso con motivo da I Semana da Seguridade Viaria de Ferrol. Partirá ás 11 horas da Praza de Armas e percorrerá 13,5 quilómetros. Como é habitual, poderán participar tanto nenos como adultos e a inscrición pode facerse minutos antes do inicio. Todos os participantes recibirán como detalle unha pulseira-brazalete reflectora da I Semana da Seguridade Viaria de Ferrol e entre todos sortearase unha bicicleta.



Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar