Novas

mércores, 11 de maio de 2022

O Concello instalará tres dispositivos de xestión electrónica coa Administración local na cidade e un na zona rural

O concelleiro do Centro de Recursos Informáticos e Organización Interna, Julián Reina, deu conta esta mañá aos grupos municipais dos obxectivos da iniciativa, que busca “avanzar na implantación na cidade dunha administración electrónica plena”. “Pretendemos facilitar ao conxunto da poboación de Ferrol o desenvolvemento das xestións administrativas dun xeito electrónico co Concello, sobre todo a aqueles que non dispoñen de medios electrónicos nos seus fogares, sen limitación de horarios e sen esperar colas”


O Concello de Ferrol vai instalar no municipio de Ferrol catro dispositivos de xestión electrónica coa Administración local, tres na zona urbana e un no ámbito rural, tal e como anunciou esta mañá o concelleiro responsable do Centro de Recursos Informáticos e Organización Interna, Julián Reina, quen deu conta dos detalles do proxecto e do seu interese para a sociedade aos grupos municipais durante a comisión de Medio Ambiente, Urbanismo, Servizos, Obras, Seguridade e Contratación. Trátase dun proxecto cofinanciable polo Fondo Europeo de Desarrollo Regional (Feder) no marco do Programa Operativo Plurirregional de España Feder 2014-2020 ao abeiro da Estratexia de Desarrollo Urbano Sostenible e Integrado (Edusi) “Ría de Ferrol, Cidade 2020”. 


O edil, quen referiuse a estes dispositivos como “caixeiros electrónicos”, explicou que o que se pretende é “facilitar ao conxunto da poboación de Ferrol o desenvolvemento das xestións administrativas dun xeito electrónico co Concello, sobre todo a aqueles que non dispoñen de medios electrónicos nos seus fogares, sen limitación de horarios e sen esperar colas”. Con este proxecto “pretendemos avanzar na implantación en Ferrol dunha administración electrónica plena”, explicou.

O Concello está a desenvolver nos últimos anos “un continuo proceso de ampliación dos servizos electrónicos ofrecidos tanto á cidadanía como ao persoal que integra a Administración local”, indicou, como é o caso das xestións que se poden realizar a través da Sede Electrónica. Co fin de proseguir neste labor, a de “lograr unha administración máis eficaz, eficiente e preto ao cidadán”, crearanse “novos canles de comunicación que permitirán aos usuarios interactuar coa Administración local dun xeito máis sinxelo e áxil”. “Entendemos que esta iniciativa vai contribuír á transformación de Ferrol nunha cidade máis intelixente”, apuntou Reina. 

O obxectivo principal é o de achegar á cidadanía a e-administración. A instalación destes dispositivos na rúa “va mellorar a accesibilidade dos procedementos administrativos á poboación ferrolá ao tempo que se fomenta a transparencia e o desenvolvemento da sociedade da información promovendo a realización de trámites electrónicos coa Administración local”. Deste modo, apuntou o concelleiro, “aumentará o número de usuarios que facen uso da administración electrónica”. 

Reina explicou que na actualidade o Concello está a traballar no pregos que definirán a instalación dos novos dispositivos, que está previsto que entren en funcionamento antes de decembro de 2023. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar