A Xunta de Goberno Local aprobou vén de aprobar o
expediente de contratación administrativa correspondente ás obras comprendidas no
proxecto básico e de execución de rehabilitación da envolvente dos números 3 e 4 da
rúa Somozas, no barrio de Recimil. Así o informou o voceiro do goberno local, Julián
Reina, tras a reunión celebrada esta mañá. Trátase dunha operación cofinanciable nun
80% polo Fondo Europeo de Desenvolvemento Rexional (FEDER) no marco do
Programa Operativo Plurirrexional de España FEDER 2014-2020 ao abeiro da
Estratexia de Desenvolvemento Urbano Sostible e Integrado (EDUSI) “Ría de Ferrol,
Cidade 2020”. Conta cun orzamento total de 368.701,47 euros (IVE incluído) e un
prazo de execución de 5 meses.
Entre outras medidas, a intervención contempla o revestimento da fachada cun
sistema illante (sistema integral de fachada tipo SATE) que permitirá limitar a demanda
enerxética necesaria para alcanzar o benestar térmico en función do clima exterior e
substituiranse as carpinterías exteriores por ventás dunha soa folla de aluminio de
apertura oscilo-batente, con rotura de ponte térmica, vidro dobre con cámara e
microaireadores. A utilización de vidro de seguridade permitirá conseguir unha ventilación segura das vivendas en plantas baixas sen que sexa necesaria a instalación
de reixas.
Ademais, entre as intervencións que se levarán a cabo atópase o desmonte
completo da cuberta e estrutura actual para executar unha nova de madeira con
illamento térmico, lámina impermeabilizante e tella. Instalaranse canles e baixantes de
zinc, marquesiñas sobre os accesos aos portais, colocaranse ventilacións, habilitarse
iluminación natural e artificial do espazo baixo cuberta, soterraranse os cables aéreos de
electricidade e telefonía e intervirase nas acometidas de gas.
Con esta actuación preténdese mellorar a eficiencia enerxética do edificio de
vivendas e as súas condicións térmicas e de estabilidade, dando solución á falta de
illamento térmico en toda a envolvente do edificio e ao mal estado da cuberta.
