Novas

venres, 06 de maio de 2022

A concelleira de Patrimonio Histórico mostra a súa sorpresa polo “enfado” da Xunta tras a aparición da muralla medieval: “Parece que quixesen ocultar os restos”

Eva Martínez Montero considera “inaudito que ante unha nova tan feliz para a cidade a consellería opte por usala para atacar ao goberno local”, e destaca que o Concello procedeu dun xeito “totalmente distinto cando hai unhas semanas apareceu unha canalización do século XVIII nas obras de Pardo Baixo, algo do que se informou con total naturalidade”. “Estou perplexa. Esíxennos ‘cautela e prudencia’, como se falaran dunha cuestión de seguridade nacional, cando o asunto comezaba a ser de dominio público en todo o barrio, pero á vista desa reacción empeza a preocuparme o que se vai facer coas outras catas no terreo, nunha das cales se encontraron


“É inaudito que ante unha nova tan feliz para a cidade como é a aparición do que, con moita probabilidade, é a muralla medieval de Ferrol, a Consellería de Vivenda opte por usala para atacar ao goberno local”. Así se manifestaba esta mañá a concelleira de Patrimonio Histórico, Eva Martínez Montero, ante “o enfado mostrado pola Xunta de Galicia porque o Concello lle pide o obvio: que conserve unha construción que considera de moito valor histórico”. 


“A verdade é que dá que pensar. Parece que quixesen ocultar os restos. Estou perplexa. Segundo leo na prensa, esíxennos ‘cautela e prudencia’, como se falaran dunha cuestión de seguridade nacional, cando o asunto comezaba a ser de dominio público en todo o barrio”, afirmou a edil ferrolá para insistir en que a demanda que onte avanzou que lle vai trasladar á Administración autonómica responde “a unha simple cuestión de responsabilidade”. “O Concello ten coñecemento dun resto arqueolóxico e reclama que se conserve e se poña en valor. ¿Onde está o problema?”, insistiu, para a continuación lembrar que, “cando hai unhas semanas apareceu unha canalización do século XVIII nas obras de Pardo Baixo, foi algo do que se informou con total naturalidade por parte do Concello, e procurouse responder ás preguntas que nos trasladaron, pese a que aínda estaban pendentes, por parte dos técnicos, traballos que se están a facer estes días”.

Datar os restos do lume 
Para Martínez Montero, a conservación do muro “non interfire en absoluto co proxecto construtivo que o IGVS ten para a parcela, porque a zona do xacemento está no patio traseiro do soar, pero, á vista desa reacción, empeza a preocuparme o que se vai facer coas outras catas do terreo que si quedarían debaixo do edificio. Nunha delas parece ser que se encontraron o que poderían ser sinais do incendio de 1568”. A edil referíase a unha capa de solo de cor escura e da que aparentemente forman parte cinzas e materiais carbonizados, posiblemente coincidente cun episodio recollido en diversas fontes escritas. “Sería moi conveniente datala con certeza para saber se se corresponde co lume que asolou Ferrol a finais do século XVI”, subliñou. 


“Sería incrible que se optara por algo distinto á posta en valor do xacemento” 
A edil de Patrimonio Histórico insistiu hoxe en que é “imprescindible” ampliar as pequenas escavacións que se fixeron ata o momento no soar, onde o Instituto Galego da Vivenda e Solo ten prevista a construción dun edificio no marco do plan Rexurbe. A actuación abranguería todo o ancho do terreo cando menos na zona na que non se vai levantar o inmoble. Trátase dunha superficie de arredor de 40 metros cadrados. O obxectivo sería conservar os restos e poñelos en valor coa intención de que no futuro se puidesen visitar. “Cando a Xunta di que hai que esperar antes de decidir sobre a mellor maneira de proceder, supoño que non se referirá a decidir sobre se conservar os restos ou non. Proceda como proceda, sería incrible que optara por algo distinto á posta en valor dun xacemento que podería incluír o primeiro fragmento da muralla medieval do que se ten noticia”, concluíu.



Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar