Novas

venres, 06 de maio de 2022

O Concello recibiu no primeiro día de prazo 114 solicitudes para axudas á rehabilitación de inmobles

A maior parte corresponderon á área de rexeneración e renovación urbana (ARRU) da Magdalena e Ferrol Vello, con 110 para as 85 intervencións previstas, mentres que para Esteiro Vello se achegaron 4 sobre as 30 totais e para A Graña están dispoñibles as 8 que se contemplan na convocatoria. O concelleiro de Urbanismo, Julián Reina, mostrou a súa satisfacción pola alta demanda que se rexistrou unha vez máis e animou aos propietarios de inmobles na Graña e Esteiro Vello a optar a unhas subvencións “das que deben beneficiarse todos os barrios históricos, e non só o centro”


Durante a primeira xornada para pedir subvencións destinadas á recuperación de inmobles nas áreas de rexeneración e renovación urbana dos barrios da Magdalena e Ferrol Vello, A Graña e Esteiro Vello con base no Plan Estatal de Vivenda 2018-2021, o pasado mércores, “demostrouse, unha vez máis, que Ferrol é a cidade galega que máis aposta pola rehabilitación”, asegurou o concelleiro de Urbanismo, Julián Reina, logo de que o seu departamento fixera balance da apertura do prazo de presentación de solicitudes. A demanda ascendeu a 114 intervencións, para un total de 123 intervencións incluídas na convocatoria. A maior parte delas corresponden á área de rexeneración e renovación urbana (ARRU) formada polos barrios da Magdalena e Ferrol Vello. 


As cifras en detalle foron as seguintes: para a ARRU formada polos dous barrios do centro urbano achegáronse 114 peticións, que xa superaron as 85 intervencións contempladas nas bases da convocatoria; no caso de Esteiro Vello, entraron por rexistro 4 solicitudes, de modo que quedan aínda dispoñibles 26, ata o total de 30; finalmente, as 8 previstas para A Graña seguen a disposición dos interesados. En canto ao ámbito das intervencións, 79 refírense a rehabilitacións de vivendas e 35 a espazos comúns dos edificios.

Aposta por todos os barrios históricos 
“Pese á gran contía que conseguimos este ano, confirmouse a tendencia de que no caso da Magdalena e Ferrol Vello a convocatoria soe esgotarse nun só día. Dende o goberno local tiñamos moita confianza na resposta das persoas interesadas en rehabilitar, e confirmáronse os nosos cálculos”, asegurou Reina, ao tempo que animou á veciñanza de Esteiro Vello e A Graña a optar a unhas axudas “das que deben beneficiarse todos os barrios históricos, e non só o centro”. O edil explicou que nestes casos “sempre costa un pouquiño máis darlles saída, pero non por iso se vai deixar de apostar por unas zonas da cidade que tamén necesitan este tipo de intervencións, e estou seguro de que tamén neles acabarán esgotándose os fondos”. Estas axudas enmárcanse no convenio asinado o pasado decembro entre o Ministerio de Transportes, Mobilidade e Axenda Urbana, a Xunta a través do Instituto Galego da Vivenda e Solo (IGVS) e o Concello de Ferrol, que se encarga da xestión do programa. As contías máximas das achegas incluídas na convocatoria ascenden a 1.315.628,94 euros, dos que máis do 87,5 % achégaos a Administración central e o resto a autonómica. Por áreas, os barrios da Magdalena e Ferrol Vello recibirán, en conxunto, 1.000.409,83 euros (875.604 do Estado e 124.805,83 da Xunta); A Graña, 72.945 euros (61.716 do Estado e 11.229 da Xunta), e en Esteiro Vello, 242.274,11 euros (215.000 do Estado e 27.274,11 da Xunta). 

Aos máis de 1,3 millóns de euros que suman estas axudas, únense tamén, fóra da convocatoria, a subvención destinada á rehabilitación dos pisos de propiedade municipal en Recimil e custes derivados da xestión da rehabilitación por parte do Concello, co que se acadarán os 1,7 millóns de euros. No caso de Recimil, ademais da achega do Plan Estatal de Vivenda, Administración local investirá máis de 150.000 euros como propietaria dos inmobles. 

Con esta convocatoria, a ARRU da Magdalena e Ferrol Vello acada a décimo quinta fase das axudas. No caso da da Graña, trátase da décima, e no da de Esteiro Vello, da cuarta. 

Asesoramento da Oficina Municipal de Rehabilitación 
Nas bases contémplase a posibilidade de que os particulares poidan solicitar unha visita por parte dos profesionais da Oficina Municipal de Rehabilitación de Ferrol previa á solicitude oficial das axudas, coa finalidade de obter asesoramento. Deste modo, os técnicos poderán comprobar o estado da edificación e informar ao particular sobre as posibilidades de mellora e rehabilitación de cada inmoble. 




Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar