Novas

xoves, 05 de maio de 2022

O Concello celebrará o Día Internacional da Fibromialxia e Fatiga Crónica cun showcooking no mercado da Magdalena e unha ponencia sobre nutrición saudable

A edil de Benestar Social, Eva Martínez Montero, presentou xunto á presidenta de Affinor, Elena López, a programación. As actividades estarán abertas á cidadanía en xeral


O Concello celebrará o Día Internacional da Fibromialxia e Fatiga Crónica cun showcooking no mercado da Magdalena e unha ponencia sobre nutrición saudable

O Concello de Ferrol, en colaboración coa asociación Affinor, vai celebrar o Día Internacional da Fibromialxia e Fatiga Crónica, que se conmemora cada 12 de maio, cun showcooking con degustación sobre alimentación saudable e unha charla formativa a cargo dunha nutricionista, tal e como presentou esta mañá a concelleira de Benestar Social, Eva Martínez Montero, acompañada pola presidenta da entidade, Elena López. 


A edil deu conta esta mañá aos grupos municipais da programación durante a comisión de Benestar Social, Igualdade, Muller, Xuventude e Patrimonio Histórico. Explicou que o sábado, día 7 de maio, terá lugar na cociña do mercado municipal da Magdalena, entre as 11.30 e as 13.00 horas, un showcooking saudable dirixido tanto ás persoas que sofren as doenzas da fibromialxia e fatiga crónica como ao público en xeral. Elaboraranse diferentes receitas específicas para estas enfermidades e haberá un stand informativo no que unha dietista-nutricionista estará a dispor da cidadanía para resolver dúbidas ás persoas que se acheguen, con reparto de folletos informativos específicos. 

O día 10 de maio, ás 18 horas, celebrarase no Edificio Social unha charla informativa a cargo duna nutricionista sobre alimentación saudable en persoas con fibromilaxia e fatiga crónica, de 45 minutos de duración e outros 15 para resolver dúbidas. As actividades estarán abertas á participación de toda a cidadanía. 

Estas actividades, tal e como explicou Martínez Montero, “pretenden concienciar á sociedade en xeral, e de forma específica ás persoas -case todas mulleres- que sofren algunha destas doenzas, da importancia que ten levar unha alimentación saudable, na prevención, primeiro, e no tratamento, despois, das mesmas”. 

Pola súa banda, López quixo agradecer esta mañá a implicación e apoio do Concello de Ferrol no desenvolvemento destas actividades e apuntou a “importancia” de abordar estas doenzas desde un punto de vista “multidisciplinar”. A presidenta de Affinor apuntou que este ano ae abordará especialmente o coñecemento da microbiota.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar