Novas

luns, 02 de maio de 2022

O goberno local continúa coa rehabilitación de Recimil tras aprobar o proxecto para actuar en estrada de Castela, 14

O voceiro do goberno local, Julián Reina, anunciou esta mañá que a Mesa de Contratación Permanente propuxo para adxudicación a mellora do aglomerado da estrada Valón-Brión e a rehabilitación de cubertas e fachadas do edificio do Concello


O goberno local continúa coa rehabilitación de Recimil tras aprobar o proxecto para actuar en estrada de Castela, 14

O goberno local de Ferrol aprobou esta mañá o proxecto básico e de execución da rehabilitación da envolvente para a mellora da eficiencia enerxética no edificio número 14 da estrada de Castela, no barrio de Recimil, tal e como anunciou esta mañá o voceiro do goberno local, Julián Reina, tras a celebración da Xunta de Goberno Local de cada luns. 


O tamén concelleiro de Urbanismo indicou que esta intervención significa “un novo paso na rehabilitación de Recimil”, un barrio “no que neste mandato se executaron obras en bloques das rúas Dez de Marzal, Narón, Betanzos e Ares, e van continuar cos proxectos da praza de España, da rúa Somozas e este da estrada de Castela”. É unha obra cofinanciable nun 80 % polo Fondo Europeo de Desenvolvemento Rexional (FEDER) no marco do Programa Operativo Plurirrexional de España FEDER 2014- 2020. Estratexia de Desenvolvemento Urbano Sostible e Integrado (EDUSI) “RÍA DE FERROL, CIDADE 2020”. Conta cun prazo de execución de seis meses e un orzamento (impostos incluídos) de 163.659,51 euros. 

Actuarase nun edificio con seis vivendas e dous baixos e a obra comprende a intervención sobre a fachada e as fiestras do edificio, posto que a cuberta xa fora substituída con anterioridade e atópase en bo estado. Con elo búscase mellorar a eficiencia enerxética e as condicións térmicas. Nas fachadas instalarase un sistema integral tipo SATE, composto dun illamento exterior que replicará as molduras existentes, e colocaranse fiestras de aluminio lacado en branco, con apertura oscilobatente, rotura de ponte térmica e vidro de dobre cámara. A utilización de vidro de seguridade permitirá que non sexa necesaria a instalación de reixas nas plantas baixas. O voceiro explicou que pese a que non se vai intervir na cuberta, si se instalará illamento térmico sobre o forxado do baixocuberta, xa que o tellado carece del. Ademais, substituirase o canalón actual por un de maior sección e de zinc.

Reina tamén anunciou que o goberno local aprobou esta mañá o proxecto de aglomerado do camiño do Cano, unha vía duns 400 metros de lonxitude que parte da zona de Basanta-Cristóbal Colón e dá servizo a un grupo dunha ducia de vivendas que se atopan ao outro lado do acceso Norte. Esta obra conta cun orzamento de execución de 48.397, 11 euros (con ive) e ten un prazo de execución dun mes dende a firma da acta de traza de planta. 

Sobre outros asuntos de actualidade municipal, o voceiro do goberno local comunicou que o Concello de Ferrol vén de presentar dous proxectos á convocatoria do programa de axudas a entidades locais para a rehabilitación de edificios públicos de titularidade local do Ministerio de Transportes, Mobilidade e Axenda Urbana, o coñecido como programa Pirep Local. O primeiro consiste na adecuación e rehabilitación do Mercado de Recimil no marco das “diferentes actuacións que está a desenvolver o Concello en canto á rehabilitación de vivendas no barrio”. O proxecto contempla a recuperación do mesmo, a mellora dos postos, o seu acondicionamento térmico, a mellora da iluminación, a optimización do illamento térmico, entre outras actuacións. O segundo céntrase na rehabilitación do actual local social da asociación de veciños de Serantes, na avenida 19 de Febreiro, “co que pretendemos mellorar as súas instalacións e promover máis actividades e dinamismo social”. Trátase dun proxecto acordado coa propia asociación de veciños froito de numerosas reunións.

Novas propostas de adxudicación 
En canto á sesión de hoxe da Mesa de Contratación Permanente do Concello, acordouse propoñer para adxudicación a mellora do aglomerado da estrada Valón-Brión, unha obra correspondente ao POS 2021. O importe é de 83.928 euros (impostos incluídos). Esta vía, explicou o voceiro local, conta cunha lonxitude de 2.025 metros e o proxecto contempla actuar nun total de 10.800 metros cadrados. O prazo de execución é de 13 semanas desde a firma da acta de traza de planta. 

A Mesa tamén propuxo para adxudicación a rehabilitación de cubertas e fachadas do edificio do Concello, unha actuación incluída no POS Adicional 2019. Reina explicou que este proxecto opta por unha solución ideada polo arquitecto autor do edificio, Nemesio López. Consiste na eliminación das actuais bufardas, xa sen o seu uso orixinal de dar servizo as vivendas que había na parte alta do inmoble, para acadar unha cuberta continua, neste caso de zinc, co obxectivo de rematar cos problemas de estanqueidade que presenta a actual de fibrocemento e tella, onde medra a vexetación. Conta cun prazo de execución de tres meses dende o inicio dos traballos e cun orzamento de 656.190,05 (impostos incluídos). 

O novo proxecto contempla o cambio de revestimento da cuberta, a demolición das bufardas e a instalación de fiestras xiratorias, a retirada dos pináculos da torre do reloxo, a reparación puntual das semiviguetas do forxado da cuberta e o pintado das fachadas do edificio. Previamente realizaranse as correspondentes demolicións das placas de fibrocemento, a tella, a fábrica de ladrillo, as cubertas das bufardas, as carpinterías de madeira, o sollado de baldosa, as cornixas e ornamentos e os lucernarios. Posteriormente procederase á reparación estrutural do formigón onde sexa necesario, construiranse os forxados no lugar das bufardas e colocaranse o recubrimento con lámina de zinc con dobre engatillado, as fiestras para cubertas, o lucernario ventilado con vidro laminar, unha azotea transitable e repoñerase baldosa hidráulica no sollado. En canto ás fachadas, lixaranse as superficies, recebaranse e pintaranse cunha paleta de cores en tons grises, diferenciando fondos, detalles e zócalo.

Un segundo piano na praza de Amboage e comezo da segunda ronda 
O voceiro do goberno local anunciou esta mañá a colocación por parte do Concello dun segundo piano na rúa con motivo da celebración estes días do Concurso Internacional de Piano de Ferrol, neste caso na praza de Amboage. Ao igual que no caso do da praza de Armas, estará dispoñible ata o día 8 de maio para que músicos e aficionados podan tocalo. Tamén é necesario inscribirse antes e reservar un tramo horario no correo concurso@ferrolpianocompetition.com. En canto ás rondas eliminatorias que se están a levar a cabo no Teatro Jofre, onte domingo rematou a primeira e hoxe pasaron á segunda 36 dos 53 participantes que acudiron á cidade para participar no certame. A segunda ronda celebrarase entre hoxe e mañá e a semifinal os días 4 e 5. As rondas estanse a celebrara desde as 10 horas e desde as 16 horas e son de balde e de acceso libre, tal e como lembrou Reina. “Queremos insistir en animar á poboación a acudir ao Jofre a escoitar a estes grandes artistas que ata o día 8 de maio estarán na nosa cidade”. 

Aberto prazo de inscrición para unha nova saída para maiores 
Noutra orde de cousas, Reina anunciou que hoxe luns, 2 de maio, abriu o prazo de inscrición para a seguinte saída do programa para persoas maiores ‘Ferrol Amodo’, posto en marcha no mes de marzo polo Concello co fin de mellorar o benestar social e calidade de vida do veciños de maior idade. Esta cuarta saída terá lugar o 14 de maio e estará dedicada ao Racing de Ferrol co título ‘Un século de paixón verde’. Como nos casos anteriores, o número de prazas está limitado a 20 e as inscricións pódense realizar a través do correo ferrolamodo@gmail.com ou no número de teléfono 631 683 070, de luns a venres, de 10 a 12 horas. 

“Éxito” da Fashion Night 
O voceiro do goberno local quixo esta mañá destacar o “éxito” da Fashion Night do pasado venres, a primeira na cidade tras a pandemia. “Reuniu a milleiros de persoas polas rúas do barrio da Magdalena” nun evento impulsado pola Asociación de Comerciantes de Ferrol Centro (Acof) en colaboración co Concello de Ferrol. A cidade acolleu multitude de actividades para todos os públicos, actuacións musicais, de baile e tamén deportivas, indicou. Felicitou aos sectores implicados no evento e destacou que “entre todos estamos a dinamizar a actividade económica do comercio e hostalería co fin de intentar atraer visitantes á cidade”. 





Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar