O concelleiro de Urbanismo, Julián Reina, deu conta esta
mañá aos grupos municipais da aprobación, na Xunta de Goberno Local celebrada o
luns, do Proxecto Básico e de Execución e Estudo de Seguridade e Saúde para a Mellora
da Accesibilidade de Cruces de Peóns na súa quinta fase. O edil avanzou que o goberno
local traballa coa previsión de poder aprobar tamén o expediente de contratación ao
longo da vindeira semana co fin de iniciar en breve o proceso de licitación.
Esta actuación ten un orzamento de 555.771,53 euros (con impostos) e
contempla actuar sobre 186 pasos de peóns da cidade: 39 na zona da Gándara, 16 en
San Xoán, 73 en Caranza, 10 no Ensanche A e 48 na zona da Malata e o Porto.
A reunión da Comisión Informativa de Medio Ambiente, Urbanismo, Servizos,
Obras, Seguridade e Contratación serviu tamén para que Reina explicara os pormenores
da sentenza do Tribunal Supremo de 23 de febreiro pola cal se declara a nulidade de
pleno dereito do acordo de aprobación definitiva do Plan Especial de Protección e
Rehabilitación do Barrio de Ferrol Vello, adoitado polo pleno da corporación municipal
en decembro do 2015. O edil reiterou tras a xuntanza que o Concello xa está traballando
na liña de aprobar de novo o plan. Sobre a posibilidade de realizar unha modificación puntual do Plan Xeral para poder acometer a rehabilitación da casa de Carvalho Calero
(principal prexuízo que causa a sentencia), descartouna por dous motivos: o principal é
que a tramitación de dita modificación require prazos similares aos da nova aprobación
do PEPR, e o segundo, que non ten sentido centrarse nunha simple modificación
puntual cando o Plan Especial abrangue todo o barrio e xa inclúe a cualificación
urbanística da casa de Carvalho Calero necesaria para poder acometer a obra.
“O axeitado para rehabilitar a casa de Carvalho Calero e volver aprobar o Plan”
Nese senso, Julián Reina, apostou claramente por centrarse nunha nova tramitación do
PEPR. “O máis axeitado para poder rehabilitar as edificacións comprendidas no
proxecto da casa de Carvalho Calero é volver aprobar o Plan Especial. Traballar nunha
modificación puntual suporía duplicar esforzos e non obter ningún resultado en canto a
redución de prazos”, afirmou.
