Novas

sábado, 22 de xaneiro de 2022

O Concello instalará xaulas para capturar xabaríns

A edil de Medio Ambiente, Ana Lamas, acordou coa xefa territorial da Xunta que Ferrol se fará cargo da contratación do servizo e a Administración autonómica porá a disposición axentes ambientais e elaborará os protocolos de actuación


O Concello de Ferrol fará fronte ao aumento da poboación de xabaríns nas zonas urbanas e periurbanas do termo municipal logo de chegar a un acordo coa Xunta de Galicia que fixará o marco de actuación. Segundo explicou a concelleira de Medio Ambiente, Ana Lamas, logo dunha reunión mantida en días pasados coa xefa territorial de Medio Ambiente da Xunta, Cristina Carrión, ao longo das últimas semanas ambas Administracións estiveron en permantente contacto co fin de aclarar o procedemento axeitado para atallar o problema. “A normativa para a captura de xabaríns refírese a ámbitos rurais, pero no que respecta a zonas urbanas, non está claro como se debe proceder, de modo que quixemos actuar con toda a seguridade xurídica”, explicou Lamas, que destacou o bo entendemento entre as dúas Administracións. “Hai tempo que nos preocupa moito o incremento do número de xabaríns, pero capturar estes animais require instrumentos tanto materiais como normativos dos que o Concello non dispón, e de aí que solicitáramos á Xunta protocolos de actuación adecuados”, engadiu. 


O acordo acadado, nun marco de “total colaboración”, asegurou a edil, implica que o Concello instalará xaulas para capturar os animais. Ao carecer de medios propios para facelo, contratará este servizo proximamente. Pola súa banda, a Xunta aportará os axentes ambientais necesarios para definir as operacións, ademais de achegar un protocolo de actuación axeitado. 

Lamas lembrou tamén que por parte do departamento de Medio Ambiente local xa se iniciaron labores para a identificación de puntos de presenza de xabaríns da man de entidades veciñais como a de Canido, barrio en cuxas inmediacións se detectou a existencia de numerosos exemplares. Ese traballo previo servirá agora para decidir o emprazamento máis axeitado para as xaulas. 

A concelleira destacou que vai ser o primeiro dispositivo deste tipo que se desenvolva en Galicia en zonas urbanas, o que requerirá dunha autorización especial por parte da Xunta. Segundo explicou a Administración autonómica, ata o momento só se puxeran en marcha accións contra os xabaríns a través de tecores. “Vai ser unha experiencia pioneira, motivada pola urxencia de dar solución a un problema cada vez máis grave pola que hai tempo que espera a veciñanza, e vaise pór en práctica incluso antes de que exista o marco de colaboración anunciado pola Xunta para facilitarlles aos concellos os procedementos para reducir as poboacións de xabaríns”, finalizou.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar