Novas

venres, 21 de xaneiro de 2022

O alcalde, Ángel Mato, en Cidade Xardín: “O máis importante é que con estas obras as familias van conseguir licenza de primeira ocupación despois dunha década”

Ángel Mato e o concelleiro de Urbanismo, Julián Reina, visitaron esta mañá as obras para o arranxo das deficiencias da urbanización, que deron comezo esta mesma semana


O alcalde, Ángel Mato, en Cidade Xardín: “O máis importante é que con estas obras as familias van conseguir licenza de primeira ocupación despois dunha década”

O alcalde de Ferrol, Ángel Mato, e o concelleiro de Urbanismo, Julián Reina, visitaron esta mañá acompañados por técnicos municipais e responsables da obra os traballos que desde comezos desta semana está a executar o Concello en Cidade Xardín, no Vinculeiro, co fin de arranxar as deficiencias na urbanización. Tras percorrer os tramos nos que se están a desenvolver as primeiras actuacións —entre a Avenida do Vinculeiro e a rúa Monte do Ameneiral —, o rexedor apuntou que ‘o máis importante é que con estas obras as familias van conseguir por fin licenza de primeira ocupación despois dunha década”. A actuación global conta cun orzamento de 695.207,56 euros (IVE incluído) e un prazo de execución de sete meses. 


Mato indicou que a intervención “vai pechar un grave problema que levan soportando os veciños desde hai máis de dez anos” e anunciou que estas obras permitirán que a urbanización se inclúa nos contratos municipais, como os de limpeza de zonas verdes ou o de recollida de lixo, entre outros, “para garantir a tranquilidade das familias que viven aquí”. O alcalde tamén lembrou os “complexos pasos administrativos que tivemos que dar para solucionar a situación para os veciños tras a quebra da construtora”. Pola súa banda, Reina indicou que se lles trasladou aos veciños as distintas fases que compoñen as obras, que comezaron pola zona máis alta da urbanización ata a máis baixa.

O proxecto inclúe a conexión da avenida do Vinculeiro coa estrada de Santa Icía mediante un paso de peóns na avenida, a conexión viaria entre a urbanización Cidade Xardín e a urbanización O Boial e tamén a continuación da beirarrúa no oeste da urbanización, que dará continuidade ao itinerario peonil desde a avenida Buque Escola Galatea ata a rúa Cruz de Arriba. Tamén recolle a execución da rasante da beirarrúa entre a estrada de Santa Icía e a rotonda norte da urbanización e a colocación de salva bordos metálicos para facilitar o acceso ás vivendas. Instalarase unha banda de baldosas direccionais en todos os pasos de peonís no interior da urbanización e repoñeranse os bordos e beirarrúas en mal estado. Do mesmo feito realizarase unha limpeza xeral nas beirarrúas, eliminaranse os elementos vexetais e rozarase a maleza. 

O proxecto contempla o acondicionamento das glorietas na avenida do Vinculeiro, que incluirá a eliminación das malas herbas e a poda do arboradura, así como nova sinalización vertical e horizontal. Tamén se desenvolverán traballos de reparación na rede de abastecemento de auga no interior da urbanización, como a limpeza interior das arquetas de abastecemento e a substitución das tapas. Do mesmo xeito, levaranse a cabo todas as reparacións necesarias nas redes de saneamento e de pluviais. En canto á rexeneración de zonas verdes, levarase a cabo a roza e limpeza do terreo, formaranse sendas peonís, plantaranse carballos, castaños e nogueiras, instalaranse novos bancos e papeleiras e renovarase a rede de alumeado dentro da zona verde.




Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar