Canal RSS de novas

Comparte esta páxina

Facebook

Twitter

Google +

venres, 21 de xaneiro de 2022

O Concello e Protección Civil celebrarán en febreiro a primeira Xornada de Rescate de tartarugas e mamíferos mariños

O concelleiro de Seguridade e Sanidade, Germán Costoya, anunciou esta mañá que a formación está dirixida a servizos municipais de Protección Civil, asociacións medioambientais que colaboran neste tipo de emerxencias e a corpos municipais en competencia na materia. A formación impartiraa a Coordinadora para o Estudo dos Mamíferos Mariños (Cemma) e terá lugar o 20 de febreiro, de 10 a 13 horas, no centro cívico de Caranza

O Concello de Ferrol vai celebrar en colaboración con Protección Civil de Ferrol e a Asociación Provincial de Protección Civil a primeira Xornada de Rescate de tartarugas e mamíferos mariños na cidade, que terá lugar o próximo 20 de febreiro, de 10 a 13 horas, no centro cívico de Caranza, tal e como anunciou esta mañá o concelleiro de Seguridade e Sanidade, Germán Costoya. 

O edil explicou que a formación está dirixida a servizos municipais de Protección Civil de Galicia, a asociacións medioambientais que colaboran neste tipo de emerxencias e a corpos municipais con competencia na materia. O prazo de inscrición xa está aberto a través do enlace https://forms.gle/AHSpW4bs74oHFX6E7. No caso das agrupacións de voluntarios de Protección Civil, as inscricións deberán canalizarse a través das súa xefaturas mediante a Asociación Provincial. 

A formación impartiraa a Coordinadora para o Estudo dos Mamíferos Mariños (Cemma), que abordará a descrición e identificación das distintas especies de cetáceos, lobos mariños e tartarugas mariñas; a rede de varamentos, o seu funcionamento, medios e protocolos de actuación xeral; e a súa asistencia: protocolos de actuación no caso de varamentos vivos ou mortos (pequenos e grandes cetáceos, lobos mariños, tartarugas mariñas) e a xestión e retirada dos restos. 

Costoya indicou que se trata dunha xornada “moi importante” para Ferrol “posto que nos últimos tempos atendemos varias emerxencias deste tipo”. A nosa vontade “é que os nosos profesionais conten coa mellor formación posible”.