Canal RSS de novas

Comparte esta páxina

Facebook

Twitter

Google +

mércores, 19 de xaneiro de 2022

O audiovisual “Love Ferrol” exhibe en Fitur as virtudes da cidade como destino turístico

O alcalde, Ángel Mato, avanzou durante a presentación na feira internacional que o Junior Pro Ferrol de surf se celebrará este ano en maio e se ampliará a sete días de competición tras o éxito acadado no 2021. A concelleira de Turismo, María Teresa Deus, destacou o patrimonio, o Camiño Inglés e festas como a Semana Santa, as Pepitas ou as Meninas entre os puntos fortes do “maravilloso produto turístico que posuímos”. O espazo do Concello incluíu nesta ocasión a proxección dun vídeo promocional da Semana Santa ferrolá e a intervención do presidente da Xunta Xeral de Confrarías, César Carreño, e o secretario, Fernando Iguacel

Love Ferrol. Con ese lema, título tamén do audiovisual que abriu o espazo do Concello en Fitur, participou a cidade este ano na feira internacional de turismo que comezou hoxe en Madrid. Foi unha presentación que rematou coa intervención do alcalde Ángel Mato, que anunciou as datas da Junior Pro Ferrol para este ano: a competición pasará de dous días de duración a sete, entre o 9 e o 15 de maio, tras o éxito da primeira edición. Trátase dunha proba que o Concello quere potenciar porque “reúne natureza, deporte e turismo sostible”, destacou o rexedor, para o que o surf constitúe unha das grandes potencialidades turísticas de Ferrol.

A elas engadiu a candidatura a patrimonio mundial, en cuxa potenciación está traballando o Concello e que está avalada por bens de tanta relevancia que xa facilitaron a inclusión da cidade na lista indicativa da Unesco. 

O vídeo que puideron ver os asistentes, tal como avanzaba a concelleira María Teresa Deus na súa introducción, contén as principais fortalezas de Ferrol como destino turístico. Entre elas, mencionou o gran patrimonio histórico que posúe a urbe, o feito de ser inicio do Camiño Inglés a Compostela ou festas coa repercusión da Semana Santa, as Pepitas ou o festival de Meninas, “referente de arte urbano”. 

A edil de Turismo explicou os detalles do plan estratéxico gastronómico Dieta Ártabra, iniciado este ano e que ten como obxectivo “converter Ferrol en destino turístico punteiuro en gastronomía sostible e saudable, buscando ligar a cidade a unha identidade culinaria a través do enorme potencial dos produtos gastronómicos que se producen na zona”. Todas elas son razóns, dixo, “para namorarse de Ferrol, porque Ferrol é un destino para namorarse”. 

Precisamente é co namoramento co que xoga o audiovisual Love Ferrol. A historia que conta ten como marco unha cita a cegas e xira en torno ao significado da palabra destino. O vídeo estará accesible ao público a partir de mañá pola mañá. 

O legado da Semana Santa

A parte central da presentación ocupouna a Semana Santa, que este ano volveu compartir espazo co Concello. Tanto o presidente da Xunta Xeral de Confrarías; César Carreño, coma o secretario, Fernando Iguacel, destacaron os máis de 400 anos de historia desta celebración, así como o legado que transmite a través das xeracións, o que supón “un orgullo”. As súas palabras estiveron acompañadas das espectaculares imaxes das procesións polas rúas e prazas de Ferrol.