Novas

mércores, 07 de abril de 2021

Concello e Xunta defenden a incorporación do ferrocarril ata Ferrol ao corredor atlántico de mercadorías

O alcalde mostrou a súa satisfacción e o seu agradecemento á Xunta por que formulara ante Europa unha reclamación que quere que teña un lugar destacado na axenda política. Mato e a conselleira de infraestruturas mantiveron hoxe unha reunión na que tamén fixaron “un escenario de financiamento concreto para o saneamento do río da Sardiña e do rural”. O rexedor ferrolán asegurou que se marca como obxectivo para este mandato o inicio dos traballos nas parroquias, unha vez que as obras da Malata están practicamente rematadas.


Concello e Xunta defenden a incorporación do ferrocarril ata Ferrol ao corredor atlántico de mercadorías

O alcalde de Ferrol, Ángel Mato, e a conselleira de Infraestruturas, Ethel Vázquez, mantiveron esta mañá unha reunión que ambos cualificaron de frutífera e produtiva. Acompañáronos o concelleiro de Urbanismo, Julián Reina, e o delegado territorial da Xunta de Galicia, Gonzalo Trenor. Sobre a mesa había unha serie de asuntos de gran importancia para a cidade, todos eles referentes ao saneamento e á mobilidade, sobre os que se despexaron “as principais inquedanzas que tiñamos”, asegurou o rexedor na comparecencia posterior ao encontro.


Un dos principais temas que abordaron foi a mellora das conexións ferroviarias, que Mato, tal e como lembrou, quere que teña un lugar destacado na axenda política. De feito, durante os últimos meses viña reclamando, por unha banda, a inclusión da liña a Ferrol na rede europea de mercadorías, e por outra, a paulatina redución dos tempos de viaxe ata A Coruña á metade. Por ese motivo, acolleu con “moita satisfacción” que a conselleira lle comunicase hoxe que vén de solicitar a Europa a ampliación do corredor atlántico de mercadorías ata a cidade, unha demanda que Vázquez considera “lexítima e xusta”, ao que se suma que “abriría as posibilidades de financiamento”. 

Nos últimos meses viron a luz dous informes elaborados polo Eixo Atlántico a petición do Concello de Ferrol nos que se analizan as necesidades do trazado. Ambos cifran en torno aos 730 millóns de euros o importe da modernización da liña para que se adapte aos estándares actuais e sexa competitiva. 

Carta do presidente da Xunta 
O alcalde tamén tivo palabras de agradecemento para o presidente da Xunta, Alberto Núñez Feijoo, que lle comunicou por carta o seu compromiso de tratar o problema do ferrocarril co ministro de Transportes, José Luis Ábalos, na xuntanza que van manter o vindeiro venres, e que é continuación da do pasado 10 de marzo. O obxectivo é, segundo dixo a conselleira, a inclusión da liña no plan de investimentos ferroviarios, algo que ve “incuestionable”. 

Outra das cuestións que trataron Mato e Vázquez foi o do transporte de viaxeiros por estrada. Para o rexedor, coas novas concesións a conexión coa Coruña presentaba “dificultades que pouco a pouco se foron resolvendo, aínda que quedan algunhas que lle trasladamos á conselleira”. Esta explicou, pola súa parte, que o seu departamento realiza “un seguimento exhaustivo e continuo” do servizo e que esta mesma semana se reforzou a liña entre ambas cidades. 

A segunda parte do encontro referiuse aos proxectos de saneamento en marcha e os previstos a curto e medio prazo. Unha vez que as obras na Malata están practicamente rematadas (a falta de pequenas actuacións e a acometida eléctrica por parte do Concello), Ángel Mato e Ethel Vázquez falaron do saneamento do río da Sardiña e das actuacións na zona rural. No primeiro caso, explicou a conselleira, o proxecto está redactado e en cuestión de días remitiráselle ao Concello unha proposta de convenio para levar a cabo os traballos. O rexedor explicou que a Xunta asumirá a maior parte do financiamento (entre o 70 e o 75 %) dos arredor de 900.000 euros de custo. No caso do saneamento do rural, esa proporción será inversa, de xeito que será a Administración local a que asuma o groso do importe, estimado nuns 9 millóns de euros. 

“O importante é que temos un escenario de financiamento concreto para o saneamento do río da Sardiña e para o saneamento do rural”, afirmou o alcalde, que afirmou que a súa intención é que as obras nas parroquias comecen dentro deste mesmo mandato.






 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar