Web Municipal do Concello de Ferrol

Inicio Concello De actualidade Novas

Comparte esta páxina

martes, 06 de abril de 2021

O Concello outorga á Xunta licencia para rehabilitar cinco inmobles en Ferrol Vello no marco do Plan Rexurbe

O voceiro do goberno local e concelleiro de Urbanismo, Julián Reina, presidiu esta mañá a comisión asesora do plan especial de protección e rehabilitación do barrio. O edil informou que durante a pasada semana a Policía Local interpuxo 136 denuncias por incumprimentos da normativa covid, das que 70 foron por saltarse o toque de queda

O Concello de Ferrol vén de outorgar á Xunta de Galicia as licencias necesarias para rehabilitar un total de cinco inmobles no barrio de Ferrol Vello, no marco do Plan Rexurbe, tal e como anunciou esta mañá o voceiro do goberno local e concelleiro de Urbanismo, Julián Reina, tras presidir a comisión asesora do plan especial de protección e rehabilitación do barrio de Ferrol Vello. En total abordáronse seis proxectos, e un quedou pendente de subsanación. Neste punto Reina apuntou a “estreita colaboración” que existe entre o Concello e a Administración autonómica “co fin común de recuperar e revitalizar o barrio no que naceu a nosa cidade”.

Na actualidade, tanto o Concello como a Xunta están desenvolvendo diferentes actuacións no barrio. No primeiro caso, actuando sobre a urbanización e o espazo público —como é o caso da reurbanización que o goberno local está a executar na rúa Espartero— , e no segundo, sobre a vivenda.

Sobre a rúa Espartero, o edil explicou que as obras proseguen a bo ritmo e anunciou que nos próximos días activarase a terceira fase do plan de tráfico deseñado “co fin de seguir avanzando” nos traballos ao tempo que “evitar na medida do posible molestias á cidadanía”. O edil tamén trasladou que o Concello traballa nun anteproxecto para a recuperación da casa de Carvalho Calero que confía en presentar proximamente.

Pleno extraordinario o xoves e Ucha no de abril

Reina anunciou que a continuación do pleno do mes de marzo, que non se rematou, celebrarase o xoves, 8 de abril, ás 18 horas, e no de este mes de abril abordarase a concesión por parte do Concello de Ferrol do título de Fillo Adoptivo a Rodolfo Ucha (Vigo 1882-Ferrol 1981).

Denuncias covid

A Policía Local de Ferrol anunciou que a Policía Local interpuxo un total de 136 denuncias por incumprimentos da normativa covid durante a pasada semana: 70 por incumprimento do toque de queda, 32 por reunións de non conviventes, 26 por non levar a máscara protectora, 3 por saltarse o peche perimetral, 3 por incumprimentos da hostalería e outras 2 por fumar sen distancia de seguridade.