Novas

xoves, 01 de abril de 2021

As obras na rúa Loureiros avanzan coa finalización das canalizacións de saneamento e augas pluviais

Os concelleiros de Urbanismo, Julián Reina, e de Obras, Ana Lamas, revisaron esta actuación en Santa Mariña acompañados por técnicos municipais, de Emafesa e da empresa que leva a cabo os traballos para o ADIF


As obras na rúa Loureiros avanzan coa finalización das canalizacións de saneamento e augas pluviais

A instalación das canalizacións de saneamento e pluviais na rúa Loureiros está xa concluída por parte da empresa municipal de augas. Estes traballos desenvolvéronse no marco das obras que o ADIF está acometendo no noiro situado entre ese punto e as vías do tren, e que consisten na consolidación do terreo mediante a colocación de rochas de grandes dimensións. 


Os concelleiros de Urbanismo, Julián Reina, e de Obras, Ana Lamas, comprobaron onte o avance desta actuación acompañados por técnicos municipais, de Emafesa e da empresa responsable de executar o proxecto para o organismo ferroviario. A obra da resposta a un problema que padecía esta zona de Santa Mariña dende hai tempo, xa que a falta dun muro de contención provocou o afundimento de parte da rúa Loureiros e foi necesario pechala por seguridade. A acción das choivas agravou a inestabilidade do terreo, polo que dentro dos traballos contemplouse unha solución que evite ese tipo de complicacións no futuro. Así, o Concello encargoulle a Emafesa a axeitada canalización tanto de pluviais coma do saneamento nos tramos nos que fora necesario. A empresa municipal actuou tanto no comprendido entre Cardosas e a pasarela de Santa Mariña coma no que continúa dende este paso elevado cara o leste, no que, a pesar de existir muro de contención, tamén se detectou a necesidade de adoitar unha solución para a auga de choiva. 

É precisamente este último treito o que vai quedar rematado antes, xa que unicamente falta por repoñer o aglomerado que foi necesario retirar para instalar os tubos. Así llo trasladou Emafesa aos concelleiros durante a visita, na que tamén estiveron presentes representantes veciñais aos que Reina e Lamas lles explicaron os pormenores da actuación.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar